Chanmari = Police

Nimin Toyota MPL10-ah Chanmari FC leh Mizoram Police FC te 0-0 inhnehtawk mah se inkhel hmuhnawm an chhawp chhuak a, chance ṭhahnem tak hmuh tur a awm. MPL chawlh laiin coach K. Malsawmkima leh Lalbiaksanga Colney te thawhrimna hmuhin a awm.

Inkhel an ṭan chiah aṭangin attacking football hmuh nghal a ni a, player theihna nei sang an tam avangin inkhel pawh a hnuhnawm hle. Inhliam vanga Malsawmfela a tel lo chungin Police goal bawh a na a, Lalramthara'n chance ṭha bik ṭum hnih ngawt nei mah se ruahsur vang leh tawnhriat neih tlem vangin hun ṭha a hlah.

Chanmari an insiamrem hnuah an goal bawh a na hret a, Santosh Trophy-a Mizoram goal khung khawl Lalkhawpuimawia ven bik a ni a, Police defender Laldinpuia'n tharum hmangin a veng uluk hle. Laltlanzova leh Vincent Lalduhawma ten Police tlarhnung tan buaina an siam a, goal hmuh tur erawh a awm lo.

Second half-ah Chanmari goal bawh a na lehzual a, goal chance pawh a tam. Mizoram no. 1 F. Lalmuanawma'n goal a chhuah duh lo a; Mapuia, Zozoa leh bench aṭanga lut Rohlupuia (Mapuia) ten goal an khung thei lo a, goal awm loin inkhel a tawp.