Silly Point : KAN NGHAHFAK FINAL
The winner takes it all
The loser's standing small
Beside the victory
That's her destiny
- Andersson /Ulvaeus ( ABBA)
Leilung danah a hmasa ber leh chung ber ni pha lo, a dawttu hi chuan hriat reng an hlawh ngai meuh lo a. Infiamna khawvelah phei chuan a ni nasa leh zual emaw tih tur a ni. Runners Up ten headlines an luah ngai lo a, khawvelin Champion bak a hre zui ngai lo.
Grand Finale
Ni 44 tal tawp mai India ram khawpui 10 thlachhuah ten inkhel ṭum 47 zet an thlenkual hnu in, naktuk Pathianni chawhnu hian Ahmedabad, Gujarat khawpuia inkhel entu mi 1,32,000 lenna Narendra Modi Stadium-ah, thlengtu Branch leh a tum thum nana World Champion nih tum Humara Desh leh vawi nga champion tawh Australia te an inchaltauh ang a, hmawr kan lo bawk fel dawn ta reng mai.
Saipui kal lai ang maia an hma a lo ding apiang tukzal zel India team nge palian muthlu thangharh, an inkhelh hnuhnung apianga len lam pan zel Australia team ropuina ramah lut ang tih chu kan hre thuai dawn.
India
Mi tam takin International Cricket History a team ṭha ber (Limited overs bikah) hiala an chhal tan der Rohit Sharma leh a hote hi an nep lohzia chu tun World Cup chhung ringawt pawh hian kan hmu vek.
Hetiang em ema tumpuite hnehsawh leh an ne pawh ek pha tu tawng meuh lo hi Cricket history-ah hian West Indies (1975, 1979) leh Australia (2003, 2007) hnuah khawvelin a hmuh leh vawi khatna a ni hial ang.
Zep thu a cheng lo, he India team hi a vuak leh vawm lam department-ah an tha vel vek a, a balance hi a dik a ni. Vawi khat chauh chu Rohit Sharma, Shubman Gill leh Virat Kohli te inkawp hian, laipui leh machine gun hmangkawpa hmelmate saidarh ang maiin bul an han tan leh thei ang ngem?
Jasprit Bumrah, Md Shami leh Md Siraj te inkawp hian thawhlehna hun awm miah tawh lo turin, an tumpui batsman-te an phing darh leh thei ang ngem? tih a ni ta.
India tana hlauhawm ber zawk chu, tun World Cup chhung hian, tumpui khirh leh lungphu han tirang deuh tur team an la hmachhawn meuh lo a. Semifinal Mumbai khawpuiah New Zealand lakah an han tawng chiah a, dinhmun ṭha zawk maha an la awm lai pawh khan, a chi ai zawk leh pressure zo lo zawkah an tang deuh zawk tlat kha a ni. Rahul Dravid leh a Coaching staff-te fuihna leh psychological warm up tha tak an mamawh tih a chiang.
Australia
Australia leh Cricket World Cup hi thil inzawm tlat a ni tawh a. Tun World Cup a an inkhel hmasa pahniha an mualpho a, selna leh demna tamtak an hmachhawn hnu in, diesel engine in tilum tha tawh ang maia semifinal thlenga chak loh nei lo a ṭum riat rawn kal vung leh mek, league match a an hneh loh awmchhun South Africa chu semifinal-a an hneh hnu in, tun World Cup a an tum hmasak ber leh an hneh loh India hi, tun World Cup a an inlanna hnuhnung ber turah hian dawhkan hawi zawk her danglamin a hmawr an bawk thei dawn em i lo en ang?
He Aussie ho thisenah hian boruak a san zawh poh leh an standard an ti sang ve zel thei a, champion dan riau hi an inthlahchhawng emaw tih mai tur hian a bet tlat hi India tana mut tui lohna chhan tur pakhat chu a ni.
Zep thu a cheng lo - ka ngaihdan lo pai sa reng chu hei hi a ni; Tun World Cup-ah hian he saipui kal lai India team hi lo sai thlu thei tur hriamhrei leh silai nei awmchhun chu Australia team chauh hi an ni.
Khawvel mit fukna tur Ahmedabad
Semifinal pahnih inang lo lutuk, Mumbai-a runs invuaksiakna inkhel emaw tih mai tur aṭanga rawn dingchang zawk India leh Bay of Bengal thli leh Kolkata boruak hnawng avang Eden Gardens ni lova, Eden Park, New Zealand-ah an inkhel ta emaw tih mai tur - batsman ten "Whisss," an tihna aṭanga vannei ta zawk Australia ten India khawtlang tawp Narendra Modi Stadium, Ahmedabad khuaah, history bu a hming chuangkai turin an han intawng dawn chu a ni ta.
Kan thailan fo angin, India ram hmun tinah (chhim lam tih loh chu) thlasik thli a thaw tawh a, Ahmedabad khuaah pawh hian thimhlim dai tla thei reng a ni. Hei hian kaptan pahnih in ṭhumvawra an vanneih chuan an thuthlukna tur nasa takin a nghawng dawn tih a chiang a. Engpawh chu nise, Ahmedabad pitch hi a tlangpui in batsman ten khelh nuam an tihna a ni a. Semifinal-a Wankhede lam runs a sur a a surna ang em em chu ni chiah lo mah se, semifinal pakhat zawk, Eden Gardens a runs siam a harsata hmun ang em em chu a ni bik lo ang tih huai takin a sawi ngam..
Final hmuhnawm tak i beisei ang aw!