Kuwait hnehtu India-in chakin bul an ṭan

FIFA World Cup 2026b qualifier second round-a an match hmasa berah India an chak nghal a, an hneh hi Blue Tigers aia ṭha zawka ngaih Kuwait an nih avangin India tan result ṭha a ni - kha mah mah khualmualah lehnghal!

Blue Tigers hian 1-0 in hnehna an chang a, inkhela goal awmchhun hi Manvir Singh a khung a ni - a siamsaktu maw? Mizo tlangval Lallianzuala Chhangte bawk a ni e.

India tan hian Lalengmawia Ralte (Apuia) chuan inkhel bul a ṭan a, AIFF Player of the Year ni lai Lianzuala chu bench aṭanga luhtir niin, Lalchungnunga erawh bench lamah a awm tluan thung.

India hian November 21, Thawhlehniah qualifier an khelh chhunzawm dawn a, Qatar an mikhual ang - group A inkhel dangah Qatar hian 8-1 ngawtin Afghanistan an sawp a, group aṭanga a tisang pahnih hian third round an luh bakah Asian Cup 2027 khel turin an tling ang.

Inkhel chu

India coach Igor Stimac-a'n tun hnaia a intihthiam loh pui nia an sawi Apuia'n Blue Tigers-a a kir lehna hmasa berah hmun pawimawh a chang nghal a, inkhel bul a ṭan - midfield-ah Suresh Singh leh Sahal Abdul Samad te nen an inkawp.

Tlarhnungah rin ang ngeiin Gurpreet Singh chu si ban nghaktu a ni a, a hmaah Akash Mishra, Rahul Bheke, Sandesh Jhingan leh Nikhil Poojary te an ding a, defender tuaitir Chungnunga tan hmun a awm rih lo.

Croatian coach Stimac-a'n rin loh takin 'Mizo Flash' hminglem an pek Lianzuala chu bench-ah a dah a, Mahesh Singh, Sunil Chhetri leh Manvir Singh te tlarhmaah an inkawp.

Mahse, Lianzuala tel loin Blue Tigers tlarhma an hriam tawk lo a, khualmualah Kuwait tlarhnung an rum ṭhaih hleithei meuh lo - goal lut loin chawlhlawk hman phawt a ni.

Mizo Flash

Stimac-a'n bench-a Lianzuala dah reng chu thutlukna fing a ni lo tih a hria a, Croatian coach hian minute 64-naah Mahesh Singh la chhuakin, Mizo forward a luhtir a, Lunglei tlangval luh hnuah India tlarhma an hriam sawt.

Minute 75-naah Lianzuala theihna hmuh turin kan awm nghal. Mizo forward hian mual sir aṭangin chak takin ball a tlan luhpui a, Kuwait defender-ten an dang zo lo - goal lamah ball a thlawh phei a, a awmna tur takah Manvir Singh a lo awm.

Mohun Bagan striker hian harsatna nei loin goal-ah a chantir a, India player-te an sapatal. Hun tawp thlengin Blue Tigers-in goal an chhuah lo a, Kuwait khelmualah ngei India-in hnehna hlado an chham.

India tan Qatar leh Kuwait hi team harsa tura ngaih an ni a, mahse, khualmualah Kuwait chu an hneh ta phawt. Blue Tigers tan beiseina a sang zui ang tih a chiang a, Thawhlehni zana Qatar an mikhual hunah pawh an inringtawk sawt ang.