Argentina leh Brazil an chak lo

South American World Cup qualifier-ah Argentina chu an mikhual Uruguay lakah 2-0 in an chak lo a, inkhel dangah Brazil chu an chak dawn nia a lan hnuin Colombia lakah 2-1 in an tlawm ve bawk.

Nimin zing inkhelah Argentina hi Lionel Messi hoin an inlan, anmahni rama inkhel an nih bawk avangin chak tura rinkai zawk pawh an ni. Mahse, mikhual team lamin Ronald Araujo leh Darwin Nunez te goal hmangin an hneh.

Argentina hi tun hnaiah an khel ṭha tluang rei viau - Qatar World Cup an match hmasa bera an chak loh hnuah tun ṭum hi an tlawm lehna hmasa ber a ni hial. Chak lo mah se ram 10 inel zingah erawh a sang ber an la ni tho.

Messi chuan, "Tharum an ngahin an tlan chak em em a, a bik takin midfield an thunun theih tlat avangin kan tan a harsa. Tuna kan chak lohna kan tan chuan fiahna ṭha tak a ni, team ṭha lakah kan chak lo," a ti.

Argentina hian an match lehpekah chuan Brazil an tum dawn - world champion vawi nga ni tawh hi Colombia laka tlawm hlim an nih va bawk avangin chak duh an ni dawn a, inkhel a hmuhnawm ang.

Inkhel dangah Brazil tan Arsenal forward Gabriel Martinelli chuan goal hmahruai a khung a, mahse second half tawp dawn lamah Luis Diaz chuan goal hnihin a chhang let. A pa an ruk bo an hmuh leh hnuah a match hmasaah Diaz a che ṭha hle.

Kum 26 mi Diaz inkhel lai hi a hmunah a pa chuan a en a, inkhelh banah inkuahin an mittui an dang zo lo. Misualin an rukbo hnuah an hmu kir leh a ni a, an tan chuan chanchin lawmawm bik a ni ngei ang.