Pakistan captain Babar Azam a bang?

Cricket World Cup 2023-a beisei an phak loh hnuin Pakistan captain Babar Azam chuan an ram cricket captain a nihna aṭangin a ban thu a sawi a, ODI, Twenty20 leh Test captain a nihna aṭangin a bang vek.

Mahse, Babar Azam-a'n a ban thu a puan hnu lawkah hian Pakistan Cricket Board (PCB) chuan Babar Azam chu ODI leh T20 captain aṭanga an chawlhtir thu an puang a, Test captain erawh nih chhunzawm turin sawm mah se amah hian a hnar niin an sawi bawk.

Cricket World Cup 2023-ah Pakistan hian league round-a pangana ni chungin India an mangṭha a, match kua an khelhah vawi li chiah chakin, vawi nga an tlawm a ni.

Pakistan hian batter Shan Masood chu Test captain atan an ruat nghal a, pace bowler Shaheen Afridi chu Twenty20 captain a ni ang a, ODI captain tur erawh puan a la ni rih lo thung a ni.

PCB hian an coaching staff zawng zawng chu an hna aṭangin an chawlhtir bawk a, team director Mickey Arthur pawh ban zingah hian telin, a hmun ruakah Pakistan captain hlui Mohammad Hafeez chu Director atan ruat a ni.

Pakistan cricket team hi December-ah Australia leh New Zealand-ah tour an nei dawn a, hetih huna coaching team thar nei hman turin ruahmanna kalpui mek a ni.

Babar chuan, "Thutlukna siam harsa tak a ni a, mahse, tun hi a hun tak niin ka hre si a ni. Pakistan captain ni tura ruat ka nihna kha ka la hre reng mai. Kha kum li chhung khan tawnsan leh hniam lai tam tak, khelmual chhung leh pawnah ka nei a, mahse, chuti chung chuan cricket khawvela Pakistan hming a mawi reng theih nan theihtawp ka chhuah ṭhin.

"Player ka nihna angin Pakistan tan format pathumah hian ka la khel vek dawn a, ka tawnhriat leh inpekna hmanga captain thar thlawp tlat turin ka awm dawn a ni," a ti.

Babar-a kaihhruaina hnuaiah Pakistan hian Test match 20 an khelha vawi 10-ah hnehna an chang a, mahse, nikum December khan England chu series-ah 3-0 a ngam loin, mahni muala an tlawm chian ber ṭum an tawng.

August thla khan ODI ranking-ah world number 1 an ni hman a, nikum T20 World Cup-ah khan final lut mah se, England ngam loin an tlawm thung.

PCB management committee chairman Zaka Ashraf chuan, "Babar Azam hi world class player a ni a, player a nihna angin thleng sang zel se pawh ka duh. Pakistan-in batter kan neih tawh zinga ṭha ber pawl a ni hial.

"Kan rohlu a ni a, kan thlawp zel ang. A batting-ah hian a inpekna leh theihna chu pholanin a awm ṭhin. Ṭhangtharte tana entawn tlak a ni. Batter a nihna angin ṭhang zel se kan duh a, captain mawhphurhna rit tak tel loin hei aia ṭha lehzuala khel turin a insawrbing thei ang. A thutlukna kan zah a, kan thlawp zel ang," a ti a, captain aṭangin bang mah se national team aṭanga Babar Azam ban tumna a la awm lo.