Ronaldo-a'n goal a khung leh ta!

Kum 38 ni tawh mah se Cristiano Ronaldo-a'n goal khung a bansan thei lo a, Portugal tan Liechtenstein lakah goal a khung leh ta a, an ram team hi 2-0 in hnehna a chanpui.

Ronaldo bakah hian Joao Cancelo chuan goal khat a thawh ve bawk a, match hnih khelh tur nei chunga Euro 2024 khel tura tling tawh Portugal-in hnehna an chan chhunzawm zel.

Liechtenstein hian first half lamah chuan Portugal hi an chelh thei fu a, goal khung loin chawlhlawk an hman a ngai hial - Ronaldo leh a hote tan Euro 2024 khel dawn chiang tawh mah se, Liechtenstein laka chak zawh loh hi mualphona a ni thei.

Mahse, second half ṭan aṭanga minute khatna lekah Ronaldo a inlar ta nge nge a, Ningani zan an inkhelh hmaa Ronaldo a entawn ṭhin thu sawitu Diogo Jota siamsak chu Al Nassr forward hian goal-ah a chantir.

Ronaldo hian ram tan goal 128 zet a khung ta a, international football-a goal khung hnem ber Ali Daei (108 goals) rei tak lo ding tawh a khumna chu a sang ta hle.

Group J inkhel dangah Slovakia chuan 4-2 a Iceland hnehin, Euro 2024 khel turin an inpettling a, Portugal hnung an zui dawn - Iceland hian Orri Steinn Oskarsson hmangin goal hmahruai khung zet mah se, Slovakia hian Juraj Kucka, Ondrej Duda (penalty) leh Lukas Haraslin goal hnih hmangin an chhanglet a, 4-1 a ni der.

Iceland tan Andri Lucas Gudjohnsen chuan goal khat khung ve leh mah se a team a beng harh zo chuang lo a, an mikhualna ramah Iceland tlawmin, Slovakia erawh Germany pan turin ticket an la fel.