Khatla TBL hmaah Zarkawt Serpents
Mizoram Super League champion lai Khatla TBL leh Zarkawt Serpents ten zanin dar 8:00 hian Hawla Indoor Stadium, Republic Vengthlangah semifinal an khel dawn a, nizan khan semifi-nal hmasa zawkah Mission Veng Vikings leh Tuikual South an inhma-chhawn bawk a, result kan hre hman lo.
Khatla TBL hian league round-ah Vikings hneh lo mah se an khingpui dang pali an hneh vek avangin table-ah pahnihna dinhmun an luah. Serpents hian Zarkawt BCA, Tuikual South leh Chaltlang Ryders hneh chunga pathumna dinhmun luahin league round an khar.
A chiang lo?
MSL1-ah khan Serpents hian league round hmasa pangaah chak ni hmel an hmu lo a, return leg-ah erawh BCA tih loh chu an hneh let vek, season hmasaa TBL hneh thei awm chhun an ni. Kuminah team pahnihte hi March 4 zan khan an inhmachhawn leh tawh a, Khatla hi 84-74 in an chak. Team inhlau lo leh hnehna chang thei ve ve an nih tih kan hmuh tawh avangin chak zawk tur hriat lawk a harsa.
Mizoram Super League season hmasa leh tun season kal mek thlirin Zarkawt Serpents hi team hraitthiam harsa ber pawl an ni a, season hnih chhung kan en a nih chuan TBL hi team ṭha ber an ni ti ila kan sawi sual kher lo ang.
Zarkawt aiawh Serpents
Serpents hian league match hnuhnung berah season hmasa finalist leh Marova Memorial Basketball Tournament cham-pion nilai BCA chu 76-65 in an hneh. Tualchhung basketball ngaina veng hian team pakhat chiah ṭan tur an nei tawh avangin Serpents hian ṭantu an ngah tawh dawn tih a chiang.
Arvinder Singh Bawa khai-hruaina hnuaia an match hmasa berah Serpents hian TBL hi an hneh lo a, a hnu lama an match hnih khelh lehah erawh 'game cool' tak khelin hnehna an chang ve ve. Delhi coach hi amah maia lo kal loin Sahil Sharma leh Prince Chamuah a rawn chhawm. Guwahati center Sahil hian TBL lakah hian point 26 thawk chhuak-in Hmingthanmawia chuan point 25 a nei bawk a. Mahse Sahil hi exam pawimawh a neih avangin an chhawr thei dawn lo a, channa a ni thei mai thei.
Mapuia hoin
TBL-in MSL khel turin India captain Vishesh Bhriguvanshi leh MSL1 final-a player pawi-mawh Pratham Singh an la lut thei. Mahse, feet 6 leh inches 4-a sang shooting guard Bhriguvanshi leh Pratham te hna ṭul vanga an haw thlak rih bakah City Police training lai Jospel Lalthanmawia leh R. Lalmalsawma te chuan training an zawm leh tawh avangin player pawimawh pali an chawr thei dawn lo.
Amaherawhchu, Khatla hian MVP H. Laldinsanga an la nei a, Saron Veng tlangval hian court chhungah a thiam a la theihnghilh loh bakah hotu a ni. Ani bakah hian Van-lalmuana, Lalnunsanga, David Lalrinchhana leh Eddie Zaithanmawia an la nei a, team
ṭha ber pawl chu an la ni tho.
Eng nge an sawi?
Khatla TBL manager Lal-awmpuia Pachuau chuan, "Inkhawm zan a nih avangin fans tam dan tur hi hriatthiam a harsa. Mahse dar 8-a inkhel tur kan nih avangin a tam zawk chuan min
ṭawiawm hman ka beisei. Semifinal a nih tawh avangin chetsual a thiang lo a, vawi thum inkhelh tur ni mah se a hmasa ber aṭang hian hnehna chan tumin kan bei nghal ang," tiin Vanglaini palai a hrilh.
Zarkawt Serpents manager Dino Laldinpuia Chhangte chuan, "Zarkawt mipui leh team thawhhona zarah hnehna kan chan theih kan beisei. TBL hi team ṭha an ni a, mahse hneh theih loh erawh an ni bik lo. Player hliam kan neih loh avang leh kan inbuatsaihna a ṭhat avangin kan zam lo," tiin Vanglaini palai hnenah chak an tum thu a sawi.