Rio hi ka hun hnuhnung - Bolt

Usain Bolt chuan Au-gust thlaa Brazil khaw-pui Rio de Janeiro-a Summer Olympic neih tur chu a tan hun hnuhnung a nih tawh tur thu a sawi.

Kumin January thla khan a coach Glen Mills thurawn angin Bolt hian 2020 Tokyo Olympic-ah pawh a la inlan theih a beisei thu a sawi a, mahse Jamaican sprinter ropui hian kumin bak chu infiamna khawmpui lianah hian inlan theih a inbeisei tawh lo a ni.

Olympic gold medal paruk dawng tawh Blot chuan, "Ka tan chuan Rio hi Olympic hnuhnung ber tur a ni tawh ang. Kum li dang nghah leh chu tan kan thil theih loh chu ni lo mah se a harsa tawh dawn. Phurna leh thathona neih reng a harsa a ni," tiin a sawi.

Kum 29-a upa Bolt hian 2012 London Olympic leh Beijing-ah te khan 100m, 200m leh 4x100m relay-ah te gold medal a dawng fai vek.

Bolt hian kum 2009 khan Germany khawpui Berlin-a World Championship neihah khan 100m world record (9.58 sec) leh 200m (19.19 sec) a siam a, tun thlengin khumtu an la awm lo.

Hnuhma ṭha hnut-chhiah a la duh thu sawiin Bolt chuan, "Thil lian leh ropui tak pakhat tih duh ka la nei a, chu chu 200m seconds 19 chhunga tlan thlen a ni. He ka thil tum hi tunhma pawhin ka lo sawi chhuak tawh ṭhin a, ka la hlenchhuah loh anih avangin ti thei ngei turin beiseina ka la nei," tiin a sawi bawk.