India leh Bangladesh inkhel dawn

Zanin dar 7:30-ah India chuan Bangladesh nen Twenty20 World Cup match an khel dawn a, team pahnih tan semifinal lut tur chuan chak loh a thiang tawh lo.

India hian an match hmasa bera New Zealand an hneh loh zet hnuah an hmelma kumhlun Pakistan an hneh leh a, nomawi chawi tura an beiseina chhit nun thar niin tun hi an phur vanglai tak a ni.

Bangladesh-in match hnih an khelh tawhah hnehna an la chan theih loh avangin India hneh ngei an duh dawn a, an chak lo a nih erawh chuan semifinal luh beiseina an nei thei tawh lo ang.

Twenty20 World Cup-a an intawn hma hian team pahnih hi Asia Cup-ah vawi hnih an inhmachhawn tawh a, India a chak zawkah an ṭang ve ve. Zanin an in-hmachhawn tur hi kar-thum chhunga vawi thum an in hmachhawnna tur a ni.

India tan ṭum dang ang bawkin Virat Kohli hi innghahna tur a ni leh dawn. Delhi batsman hian Pakistan an hmachhawn ṭumin batsman tana chet ṭhat harsatna ruahsur hnuaiah run 55 siamin a tawp thleng a dam a, zaninah pawh mipui mit fukna a ni leh ang.

Vawiin tlai dar 3:00 hian ropui taka South Africa hnehtu England an inlan dawn bawk a, group stage aṭanga Super 10 inhlangkai Afghanistan an hmachhawn dawn a ni.