Bangladesh hnehtu Australia beiseina a nung

Twenty20 World Cup-a an match hmasa bera an chak loh hnuin Australia-in an match hnihnaah hnehna an chang ve ta a, nimin khan Bangladesh chu wicket thumin an hneh.

M.Chinnaswamy Stadium, Bengaluru-a inkhelah Bangla-desh an bat hmasa zawk a, over 20-ah run 156 siamin mi panga an hloh. Bangladeshi batsman zingah Mahmudullah chuan run 49 siamin a tawp thleng a dam a, Shakib Al Hasan chuan run 33 a vaw chhuak ve bawk.

Australian bowler zingah Adam Zampa-a'n mit a la fal a, thla hmasa lawka Australia tana a ODI match hmasa ber kheltu spinner hian over li a vawmah run 23 chiah pein wicket thum a la.

Australia-in over 18.3-ah run 157 siamin an target an umpha a, mi pasarih chiah an hloh. Australian batsman zingah Usman Khawaja a che
ṭha fal a, ball 45 a hmachhawnan run 58 a siam.

Bangladeshi bowler zingah batting lama che ṭha Shakib Al Hasan bawk a che ṭha a, over li a vawmah run 27 chiah pein wicket thum a la. Bangladesh-in inkhel an hmachhawn pahnihah hnehna an chang zo ta lo a, semifinal lut turin beisei bo tawh tluk a ni.

Heti chung hian Bangladesh captain Mashrafe Mortaza bei-sei a la bo lo a, "Match hnih-ah hnehnah kan chang zo tawh lo a, mahse match hnih khelh tur kan la nei. Kan hmabak match hnihah erawh theihtawp kan chhuah ang a, eng nge thleng kan hria ang chu," a ti.

Bangladesh-in hmachhawn tur an la neih erawh India leh New Zealand an ni a, Pakistan leh Australia hneh lo team tan an kalkawng hi a awlsam dawn lo.

Australia captain Steve Smith chuan, "A tawp lamah kan talbuai a, keimahni thiam loh vang a ni. Kan hmabak inkhel turah chuan kan insiamṭhat a ngawi tawh ang," tiin chak mah se chawl thei an la nih loh thu a sawi.

Nizan khan inkhel pakhat chauh awmin New Zealand leh Pakistan an inhmachhawn a, he chanchin buatsaih a nih lai hian an result kan hre hman lo.