Spain squad-a tel Aduriz a lawm

Vicente del Bosque-a'n Italy leh Romania nena friendly match an khelh tura a koh zinga mi striker Aritz Aduriz chuan ram tana khel tura koh a ni leh ta chu a lawm thu a sawi.

Kum 35-a upa Aduriz hian Spain tan vawi khat chiah a la khel a, Euro 2012 qualifier-a Lithuania an hmachhawn ṭumin substitute bench aṭangin a tlan lut. Tun season-ah Athletic Bilbao tan inelna hrang hrangah goal 31 a khung tawh a, Spain tana koh a ni hi a mak lo.

Hliam vanga chawl mek Chelsea striker Diego Costa aia koh Aduriz chuan, "Spain tana koh ka ni hi ka lawm a, he hmuna ka awm hi nuam ka ti a ni. Club tan ka theihtawp ka chhuah ṭhin a, ram tana khel tura koh nih hi a harsa tih ka hria a ni," a ti.

Ram tan a inlan hmasak ber aṭanga kum nga leh a chanve hnua Spain tana khel tura koh leh ni chauh Aduriz chuan, "Ka kum ang zata ram tana khel tura koh nih hi chu thil thleng zen zen a ni lo a, ka hlim hle. Mahse, kum te chu number mai mai a ni a, a pawimawh ber chu ch^kna neih hi a ni a, chu chu ka nei a ni," tiin a phur hle.

Spain hian Ningani zan khian Italy chu khualmualah an lenchilh ang a, March 27 khian Romania an lenchilh leh bawk ang.