Thutlukna sut thei lo Pep
Pep Guardiola-a'n season thar aṭangin Manchester City a enkawl ṭan dawn a, Bayern Munich coach hian Premier League club-a Manuel Pellegrini thlak turin kum thum atan contract a ziak.
City hian Pathianni khan Man-chester Derby-ah United an hneh lo a, an dinhmun thlirin Champions League khel pha lo thei dinhmunah an ding. Citizens hian Europe-a inelna sang ber hi khel ta lo pawh ni se Spanish manager hian a contract ziahah intlawh khalhna a siam loh avangin English club hi a zawm tho tho a ṭul dawn.
Kum 45-a upa Guardiola hian Barcelona leh Bayern Munich te chiah a la enkawl a, Europa League khel club a la enkawl ngai loh avangin Pellegrini hote hi an chetchhiat chhunzawm zel chuan Spanish manager hi a chettlat ngai lohna hmunah a khawsak a ṭul dawn a ni.
City, United, Hammers
Premier League match 30 khelh tawhah City-in point 51 an hmu a, an hnuaia awm Manchester United leh West Ham ten point khat chiahin an pha lo. Club pathum hian Champions League hmunruak pakhat an inchuh dawn niin a lang a, result danglam tak a thleng a nih chuan Southampton, Stoke City leh Liverpool te hian Champions League an khelpha thei bawk.
City hian AFC Bournemouth, West Brom, Chelsea, Newcastle, Stoke City, Southampton, Arsenal leh Swansea City te an la hmachhawn dawn a. United khelh hmabakah Everton, Tottenham Hotspur, Aston Villa, Crystal Palace, Leicester City, Norwich City, West Ham leh AFC Bournemouth te la awmin West Ham hian Crystal Palace, Arsenal, Leicester City, Watford, West Brom, Swansea, Manchester United leh Stoke City te an khelhpui dawn. An fixture thlirin club pathum hian point an la hloh vek dawn niin a lang a, City-in Champions League an khelh mek bawk avangin an hmalam hun hi a eng bik lo hle.
City leh inhliam
Manchester City defender Pablo Zabaleta chuan Guardiola an lakluh avangin player-te rilru a buai thu a lo sawi tawh a, chanchinbu lama player chhuak tur leh lut tur an ziah reng avangin an ngaihtuahna zawng zawng khelmual chhunga an pek theih loh thu a sawi chu thil ni thei tak a ni.
Spanish manager-in City a zawm dawn tih a chian khan media lam chuan Guardiola-a'n Barcelona aṭanga Yaya Toure a hralh chhuah dan an ziak nasa. Ivory Coast midfielder hi City innghahna ni mah se Guardiola nen an inmil loh miau avangin a kum a upa tawh nen Etihad Stadium-ah hun rei a neih a rinawm tawh lo a, a ṭhat theih dan ber hmuh a har tawh bawk ang.
Manuel Pellegrini tana harsatna belhchhah turin derby match-a inhliam Joe Hart leh Raheem Sterling te chu thla khat bawr vel an chawlh a ngaih hmel a, April thla tawpa inlan chauh tur captain Vincent Kompany aiawhtu Martin Demichelis-a'n derby match-ah a upa tawh tih bak lantir a nei lo.
Chutihrualin City hian thu lawm-awm an nei ve tho a, international match zawhah Kevin de Bruyne, Fabian Delph leh Samir Nasri te chhawr theih turin an rawn let tawh ang.