Veng inkhelh thiam ber Bethlehem VT
Bethlehem Vengthlang chuan Aizawl District huamchhunga inkhelh thiam ber veng ni turin nimin khan Lammualah Armed Veng 2-1 in an hneh.
NECS Cup 2016-ah BVT hun a inher chhuak ve ta a, final-a goal hnih khungtu Laldingngheta chu best player a thlan niin an veng history-a a vawi khat nan veng inelnaah an champion.
Coach Lalsangzuala Hmar-in MFA Super Cup-ah BVT FC a champion pui tawh a, NECS Cup-ah champion lai Armed Veng hneha a champion pui leh tak avangin Melthum pachal hi BVT mipui tan a hlu a ni.
BVT an chungnung
BVT-in bul an ṭan ṭha a, Dingngheta'n Armed Veng defender Vanlalruata nalh taka a bum hnuah goal mawi bik a khung a, minute 9 bak a la ral lo. BVT hian inkhel thunun zui mah se hun chanve hma lamah goal an khung belh thei lo a, Armed Veng midfielder khel ṭha Lalawmpuia Hnamte-in first half tawp hma hretin Lalfakzuala leh Vanlalduatsanga te thawhrah chu goal-ah a chantir thei lo.
Second half-ah BVT an khel ṭha zui a, top scorer PC Zosanga penalty hlawhchhuah chu Aizawl FC defender Jonathan Lalhriatkima'n petin Armed Veng keeper Andrew Lalhmingliana'n a dan sak.
Penalty khung loh vangin BVT an hnual lo a, minute 67-naah Lalmawizuala (Ashte-a) ball khalh chu Armed Veng defender-ten an hual luih a, Ashte-a'n vengtu nei lo Dingngheta a pek leh si avangin keeper Andrew-a'n Armed Veng a chhan nawn thei lo.
BVT dinhmun ṭha hman mah se minute thum hnuah BVT forward Lalzatluanga handball vangin Armed Vengin minute hnih hnuah captain Lalbiakhlua penalty hmangin goal khatin an chhang let. Chanmari West winger Hlutea hian BVT defender pahnih a bum hnuah chance ṭha insiam mah se a ke veilam a hman thiam tawk lohna a lang.
Champion lai Armed Vengin siphurh sut tumin nawr ngial mah se minute 90 a ral chuan team ṭha zawk leh chak phu zawk BVT-in hnehna an chang.
Champion phu
BVT player-te inbuatsaihna ṭhat zia khelmual chhungah a lang a, mipui lam inpuahchahna a ṭha tih chu K. Kawla Stand leh S. Malsawmtluanga Stand-a kawr sen ha tam dan aṭangin a chiang bawk.
BVT team enkawltuten mipuite hnehah balloon leh flag-te a thlawnin an sem a, mipui lei theih turin T Shirt sen man tlawm, tawtawrawt leh sam lem an nei bawk. Bethlehem Vengthlang mipui thawhrimna a thlawnin a luang ral lo - Community Prize pek niin Rs 10,000 an dawn bakah an duh ber nomawi an au chhuak bawk.
BVT hian Community Prize bakah chawimawina dawn theih dang Fair Play, Best Player leh Top Scorer te an dawng bawk.
Sanga a lawm
BVT coach Lalsangzuala Hmar chuan, "Local Council member-te leh vengchhung mipui thawhrah a ni a, an inpekna rah chhuah a ni. Kumin hian coaching staff kan inthlak a, tuna team ṭha tak kan neih theih chhan hi nikum aṭanga din ṭan tawh kha a ni," tiin a thawhpui hluite a theihngilh lo.
Inkhel chungchang sawiin Sanga chuan, "Nikuma Armed Veng kan hneh loh khan a sir aṭang chauhin kan nawr ngam a, tunah chuan a lai aṭang pawhin kan nawr ngam tawh. Attacking game kan khelh rualin kan defending a ṭha a, ka naute khelh danah ka lawm hle a ni," tiin an khelh dana a lungawi thu Vanglaini palai a hrilh.
CHAMPION KALKAWNG
Second Round
Bethlehem VT 5 - 0 North Serzawl
BVT: Lalzatluanga 16'; P.C Zosanga 32'; Zoremsanga 54'; Lalrammawia 87'; Amos Lalnienga 85'
Round of 32
Bethlehem VT 2 - 0 Maubawk
BVT: P.C Zosanga 4', 75'
Round of 16
Bethlehem VT 4 - 0 Salem Veng
BVT: Michael Lalneihtira 31'; P.C Zosanga 43', 52'; Amos Lalnienga 79'
Quarterfinal
Bethlehem VT 1 - 2 Chhinga Veng
BVT: Lalmawizuala 26'; Laldingngheta 81'
Semifinal
Bethlehem VT 2-1 Vaivakawn
BVT : Lalrammawia 33'; Laldingngheta 55'
Final
Bethlehem VT 2-1 Armed Veng
BVT : Laldingngheta 9', 67'
ARM : Lalbiakhlua 70'
Lawmman
Champion Bethlehem VT Rs 1,50,000
Runner Up Armed Veng Rs 80,000
Semi Finalist Vaivakawn & Venghui Rs 10,000 ve ve
Fair Play Bethlehem VT Rs 10,000
Comunity Award Bethlehem VT Rs 10000
Best Player Laldingngheta, BVT Rs 4,000
Top Scorer PC Zosanga (Goal 6), BVT Rs 4,000
NECS Cup History
Kum Champion Runner Up
2016 Bethlehem VT Armed Veng
2015 Armed Veng Ramhlun South
2014 Ramhlun South Armed Veng
2013 Ramhlun South Durtlang Leitan