Tlai dar 2:00-ah MFA Cup final Kan champion theih ka ring - Beirona, Siaha coach

Siaha FC-in 2016 MFA Cup group stage-ah Chhinga Veng FC goal khatin an hneh lo a, vawiin tlai dar 2:00 hian Khawtetlang Field, Serchhip-ah inelna hmawr-bawk turin club pahnih hi an intawng leh dawn. Siaha coach NG Beirona chuan an inkhelh tawhna thlirin Chhinga Veng FC hi an hneh theih ngei a rinthu Vanglaini palai a hrilh.

Intawnna hmasa

March 19, Inrinni khan Chhinga Veng FC-in minute 30-naa Hmingthanmawia Hmar goal hmangin Siaha FC an hneh. An intawn hmasak zawk hian Chhinga Veng goalkeeper Vanlalawmpuia leh defender Lalnunfela te chu hnawhchhuah ni mah se Siaha FC hian an sut thei lo.

Lawma Vs MC-a

Chak tur chuan goal khung a ngai a, final-a intawng turte hian goal khung thei striker an nei ve ve. Chhinga Veng innghahna chu C. Vanlallawma a ni a, Khawzawl tlangval hian semifinal-ah goal hnih a khung bakah Rengkhawpui FC lakah hattrick a siam bawk.

Lawma bakah hian Chhinga Veng hian goal khung turin Lalthlamuana leh Lalvensanga te an nei a, Siaha FC hi an hneh tawh bawk avangin champion tura rinkai zawk an ni.

Siaha FC-in tun inelnaa goal ruk khung tawh striker MC Malsawmzuala an nei a, Dinthar FC striker hlui hi team inngahna a ni. Midfield-ah Chanmari leh Kulikawn tana khel tawh B. Beihruakhai chu team khaipa a ni.

Tlarhnungah Siaha FC-in rin bik pali Lalchhanchhuaha, Ricky Zoramthanga, Johan Mandel leh SN Hmasie te an kawl a, Chhinga Veng dang thei tur player an ni. Tawnhriat nei ṭha Ricky leh SN Hmasie te hi MPL-ah Zo United tan an khel tawh.

Eng nge an sawi?

Siaha coach NG Beirona chuan, "Chhinga Veng kan tum hmasak khan semifinal kan luh chian tawh avangin player ṭha kan awltir a, chuvangin final-ah pawh hian kan hneh theih ngei ka ring," tiin a sawi.

Beirona hi a inkhelh hun laiin midfielder ṭha a ni a, kum 2006-a West Bengal-in National U16 Championship final-a Mizoram an sawp ṭum khan Siaha coach hi West Bengal khaipa a ni.

Chhinga Veng manager Lal-thanzama Vanchhawng chuan, "Player kan dam kim a, suspend kan awm tawh lo bawk a, a lawmawm. Group match-ah hneh tawh mah ila semi final game aṭangin inzirna tur kan ngah a, chak lo thei kan ni. Chutih rualin team ṭha zawka ngaih kan ni a, kan hneh tawh bawk avangin chak ngei kan tum. Aizawl aṭangin veng mipuiten a hmunah min rawn enpui an tum bawk a, kan thlenna IOC in min support ṭha bawk a, kan lawm takzet a ni," tiin Vanglaini palai a hrilh.

Final thlir turin Aizawl leh Siaha aṭanga Serchhip pan an awm nual avangin inkhel boruak a sang sawt ang. Kum 2013 khan Serchhip-ah Chanmari FC chu H. Vanlalthlanga enkawlna hnuaiah MFA Cup an lo champion tawh a, hemi ṭum hi MPL club khelh theih hnuhnun ber a ni. MPL club tel theih loh hnuah inelna hi vawi khat chiah la neih a ni a, kum 2014 khan Champhai FC chuan an khuaah club football-a inelna ngaihhlut nomawi hi an chawi a ni.