England squad-a Joe Hart thlaktu Heaton

Championship club Burnley goalkeeper Tom Heaton chu England-in Germany leh Netherlands an hmachhawn hunah hliam vanga Joe Hart a inlan theih dawn loh avangin England aiawh turin koh a ni a, kum 29-a upa hi ram tana khel tura koh a nihna hmasa ber a ni.

Manchester City keeper Hart hi Pathianni zana Manchester United an hneh loh ṭumin hliam vanga lakchhuah a ni a, winger Raheem Sterling pawh hliam vanga lakchhuah ve tho niin England squad-ah a aiawh tur erawh koh a ni ve lo.

England boss Roy Hodgson chuan, "Joe leh Raheem-te hliam vanga an inhnuhdawh a ngaih avangin ka lunghnur hle a, kan player pawimawh tak an nih avangin an dam leh thuai theih nan duhsakna ka hlan a ni," a ti.

Hodgson chuan Heaton chung-chang sawi nghalin, "Tom hi kan zingah a lo tel fo tawh ṭhin a, England tana theihtawp chhuah turin kan lo lawm a ni," tiin a keeper thar chu a lawm.

Burnley captain hian Stoke City keeper Jack Butland leh Southampton keeper Fraser Forster-te chu England tana goal veng turin hmun a inchuhpui dawn a ni.

Tun hnaia England rama football expert-te inhnialna leh chaw tui ber erawh Wayne Rooney a ni. England captain hi hliam vangin a chawl mek a, manager Hodgson berin Rooney-a hmun a la him reng thu sawi mah se tun hnaiah English striker-te an chet ṭhat avangin Manchester United striker dinhmun hi a him loa ngai tam tak an awm.

Tottenham Hotspur striker Harry Kane-a'n tun season-a match 43 a inlanah goal 24 a khung tawh a, Premier League-ah bik goal 21 khung tawhin top scorer a ni mek.

Leicester City tan Jamie Vardy-a'n leagua-ah goal 19 khung tawhin mumang rama Foxes chenpuitu a ni. Hliam vanga rei tak a buai hnuah Daniel Sturridge-a'n ngai a awh leh ṭan tawh a, English striker hian Southampton an hmachhawn ṭumin goal class bik a khung.

Premier League-a Blackburn Rovers champion puitu striker Chris Sutton chuan Euro 2016-ah England tana khel tur chu a thlan tur nise Rooney aiah Jamie Vardy, Daniel Sturridge leh Kane-te a thlan zawk vek tur thu a sawi.

English striker zinga ropui ber ang hiala an sawi Alan Shearer chuan Harry Kane chu England tana a stiker duhthlan hmasa ber a nih thu a sawi bawk a, inhliam Rooney-a England hmalam hun a chiang ta lo hle.

England hian Inrinni zanah Germany nen friendly match an khel ang a, March 29 zanah Netherlands an mikhual bawk ang.