Sheffield tan Champions League a hnai!

Manchester City leh West Ham inkhel sawn hlat a ngaih zanah Sheffield United leh Bournemouth erawh an inkhel hman a, Sheffield-in 2-1 a hnehna changin Champions League an mitthla ṭan!

Sheffield khelmual Bramall Lane-ah thli a tam a, heti chung hian inkhel kalpui a ni - minute 13-na lekah Callum Wilson chuan mikhual team tan goal hmahruai a rawn khung nghal a, tlak hlau Cherries-in hma an hruai. 

Mahse, Championship aṭanga Premier League khel tura inhlangkai Sheffield-in an season hman ṭhat kumah mahni muala tlawm an duh lo. Billy Sharp chuan first half hun pek belhah si phurh a rawn sut a, 1-1 a ni. 

Tun hnaia bench lama hun hmang tam John Lundstram chu minute 61-naah luhtir a ni a, hun tawp nan minute sarih chiah a awm tawh tihah danglamna a thlen zui. 

Kum 25 mi midfielder hian amah ang thoa bench aṭanga lut Lys Mousset-a siamsak chu ṭha zeta a lak hnuin goal-ah a chantir a, goal dang lut loin 2-1 in an chak.

Blades goalkeeper Dean Henderson chu fak phu a ni a, Manchester United aṭanga an hawh keeper hian save ṭha tak tak a neih nual bakah 1-1 a nih laia Ryan Fraser-a shot a dansak te chu pui tak a ni. 

Sheffield hian hnehna an chan avangin palina Chelsea chu match khata khel tam chungin point hnih lekin an phak lo tawh a, season ṭantira relegation 'battle' hmachhawn tura ngaih khan Champions League chu an beisei a ni ta.