Tuikual South-in Mission Veng an BYE BYE

Second 54 chiah a awm tawh tihin Mission Veng Vikings-in point 53 an score a, Tuikual South chu point 20-in an phak lo. Inkhel entu mipui an ding suau a, Mission Veng mipui beidawngin Hawla Indoor Stadium an chhuahsan a, Tuikual South mipuiin an bye bye pahin 'in haw thei' tihin an au el zui!

Mizoram Super League Season 2 semifinal a thlen meuh chuan tualchhung basketball ngainatu an tlem lo tih a chiang. Thawhlehni zan khan inkhel entu mipui ṭhahnem tak hmaah Tuikual South-in Mission Veng Vikings 77-62 in an hneh a, final lut tur erawh a la hriat loh - April 1, Zirtawpni zanah Game 2 khelh a ni ang.

Phengphehlep ṭial mawite

Tuikual South-in league stage-ah Vikings hnehin semi-final an lut a, hemi hnu hian Zarkawt Serpents leh Khatla TBL an hneh lo.

Phengphehlep ṭial mawite tiha au rual ṭhin Tuikual South mipuiin an club a zawna an chak loh hnuah an hnual lo a, semifinal-ah ṭum dang zawng aiin an ṭawiawm ṭha. Hmahruaitu nih vanga inringtawk Mission Veng hmaah Tuikual South mipui an zam lo a, inelna ṭan hmaa an inpuahchahna ṭha a lang nghal.

Upper Kanan tlangval K. Vanlalruata'n ṭan phatah basket a nei nghal a, hun tawp thlengin Tuikual South-in hma an hruai tlang. Coach KC Lalliantluanga hnathawh a lang a, Tuikual South-in Vikings tan hmun awl siam loin player ṭha Lalrina Renthlei, Moses Zoremmawia leh Lalrinkima te chu player naranah an chhuak.

Tuikual South tan MSL1-a point nei hnem ber Mapuia Zote-in a thiamna tak tak a phochhuak a, a ngaite bawkin Vanchuangpuia a rintlak a, K-a hming sawi hmaih theih a ni loh ang bawkin F. Zodinthara'n team a ho ṭha bawk. Rawlthar player Lalchhanchhuaha leh veteran player C. Lalfakawma te'n a hun taka 3-point an score avangin Vikings hi thawhlehna hun an siam lo.

Buaina leh phurna

Tuikual South-in free throw an hlah thei meuh lo a, Vikings player-te erawhin free throw
aṭang pawhin luh an harsat hle. Mission Veng mipuiten a huna au na chang an hriat loh ang thoin player-ten chak tumin an khel tawk lo niin a lang.

Quarter tawp ber an khel a, minute 6:54 chiah a awm tawh tihin Vikings guard Lal-nunpuia chuan mawi lo takin Hmingmawizuala kut a thlak a, player pahnih hi eject an ni a. Referee thutluknaa lawm lo Tuikual South coach KC-a eject a ni bawk.

Buaina chhuah hnuah Mis-sion Veng mipui thawm a ṭha a, Tuikual South mipui an nep bik lo. Hun tawp lamah boruak sang mah se point inthlauhna a tam tawh lutuk vangin Vikings tan chak ngaihna a awm tawh lo.

Beiseina

Mission Veng mipui tam zawk an haw hnuah Lalrina Rentlei thiamna tak tak kan hmu a, a zawnin vawi thum 3-point a lut. Game 1-a Lalrina in show hun tlai deuh mah se awmze nei lo tawp erawh a ni lo. Tuikhuahtlang tlangval hi Mission Veng beiseina siamtu a ni a, Game 2 in ngaihven a hlawh sawt bawk ang.

Coach thukhawchang

Mission Veng Vikings coach Reuben Lalchhandama chuan, "Kan khelh fuh loh zan a ni a, hmahruaitu kan nih vangin Tuikual South kan zuam sual lam pawh a ni lo. Theihtawp kan chhuah a, an defence ṭhat vang te pawh a ni a, kan vanneih zan a ni lo ve bawk, kan che thei thlawt lo a ni. Game 2 a la awm a, beisei tur a la tamin ka hria. Keini chuan Dishant-a tel loin kan inpuahchah dawn a, hruaitu lamin mamawh nia an hriat chuan an chah chho ang," tiin Vanglaini palai a hrilh.

Vikings hian Dishant-a a tel loin Game 1 an khel a, semi-final Game 2-a Gujarat center a awm chuan inkhel bo-ruak a nun phah ngei ang.

Tuikual South coach KC-a chuan, "Kan khelh dan a lung-awi thlak khawp mai, Game 2 pawh hi kan chak leh ngei ka ring a, inthlahdah erawh a thiang lo. Tuikual South nawmna em em chu mipui an ni a, engtiklai pawhin kan hnungah an ding tlat a, team tan phurna nasa tak an siam an ni," tiin inkhel chhungchang a sawi.

Tuikual South hruaitute an fakawm a, buaina chhuah theih laiin fan pawr zual an beng dai a. Inkhelh banah buaina chhuah loh nan Mission Veng ṭantute haw rem hnuah an veng lam an pan ve chauh bawk.