I League-ah team pung dawn lo

All India Football Federation (AIFF) chuan season thar I League-ah second division aṭanga team pahnih tling tura ngenna awm mah se an pawm lo. Tun din-hmunah second division champion chiahin season thar-ah I League an khel ṭhin.

I League second divi-sion club-te chuan season tharah a tlem berah team pahnih chu I League khel turin tling se an duh avangin AIFF-ah rawtna an thlen a, Thawhṭannia AIFF president Praful Patel kaihhruaina hnuaia executive committee ṭhu-khawm chuan he rawtna hi an hnawl a ni.

AIFF general secretary Kushal Das chuan, "Dan thar duan reng theih a ni lo a, kumtina dan thar siam reng hi awmzia a awm lo. League-ah chuan relegation a awm a ngaih avangin tuna kan kal dan hi a ṭha a ni," tiin second division club-te rawtna an pawm loh chhan a sawi.