Zirtawpni zingah Chile vs Argentina
Zanin aṭangin South America khawmualpuite'n World Cup qualifying match an khel leh tawh dawn a, mipui ngaihven hlawh ber chu Zirtawpni zing dar 5:00-a inhmachhawn tur Chile leh Argentina hi an ni.
Hetihrual hian Inrinni zing dar 6:15-a inhmachhawn tur Brazil leh Uruguay hi sawi hmaih theih an ni bik lo a, khawvel huap pawha team ṭha ni phak pahnih inkhel tur hi ngaihven loh theih loh a ni.
South America khawmualpui aṭangin team paliin World Cup an khel dawn a, pangana hian Oceania aṭanga pakhatna nen play-off an khel dawn. Tun dinhmunah Chile pangana an ni a, parukna chu Argentina an ni - team pahnih dinhmuh a him rih lo hle.
Team pahnihin kum 2018-ah Russia pan an duh dawn a nih chuan zaninah insiamṭhat a ṭul tawh ang. Chile hian Brazil leh Peru hnehin an qualifying bul
ṭha takin ṭan mah se Colombia 1-1 a an inhnehtawkpui hnuah Uruguay lakah 3-0 in an mualpho.
Argentina erawh an match hmasa berah Ecuador lakah 2-0 in an tlawm a, a hnu lawkah Paraguay leh Brazil inhnehtawkpui lehin an match hnuhnung berah Colombia chu 1-0 in an hneh thung a, an match hnuhnung bera an chak avangin phur takin Chile an hmachhawn ang.
Chile tan Jorge Valdivia leh Charles Aranguiz-te chu hliam vangin an inlan thei dawn lo a, an player pawimawh Eduardo Vargas chu hrem vangin a inlan thei dawn lo bawk.
Tlarhnung nei ṭha lo Argen-tina tan Manchester City de-fender Nicolas Otamendi chu hliam vangin a inlan theih dawn leh dawn loh a chiang lo a, Juventus striker Paulo Dybala dinhmun a chiang lo bawk.
Argentina tana chanchin lawmawm erawh captain Lionel Messi a inlan thei tur hi a ni. Argentine striker Sergio Aguero chuan, "Kan zinga Leo a awm tih hriat hi kan tan chuan a hahdamthlak a, kan player pawimawh tak a nih avangin a bula khelh hi chu a nuam reng ṭhin a ni," a ti.
Manchester City striker chuan sawi chhunzawmin, "Argentina hi team ṭha tak kan nih avangin a chung bera awm tura beisei reng kan ni a, ram tam takin hma an sawn ve reng bawk si avangin a harsa a ni," tiin an World Cup zin-kawng chu a awlsam loh thu a sawi.
Hetihlai hian Chile keeper Claudio Bravo chuan Barcelona-a a khelhpui Messi a hmachhawn tur chu a lawm thu sawiin, "Leo hi player ṭha tak a ni a, Messi leh Angel Di Maria hi player hlauhawm bik an ni. Mahse kan hmaah hian tunge ding tih kan ngaihtuah lo a, Messi thiamna hmachhawn hi ka chak hle a ni," tiin a zam lo hle.
CONMEBOL World Cup qualification table-a pahnihna Uruguay leh pathumna Brazil inthlauhna hi point hnih chauh a ni a, Inrinni zinga chak zawk dinhmun a ṭha dawn.
Uruguay innghahna Luis Suarez chuan Barcelona tana a khelhpui Neymar nen an inchawi thu sawiin, "Neymar nen kan inchawi a, a chak lo zawk zawkin ei tur kan tum a ngai dawn. Club khat tan khel dun mah ila kan ram tan kan inhma-chhawn dawn avangin theihtawp kan chhuah ve ve ang," a ti.
Suarez-a tan World Cup 2014-a Italy defender Giorgio Chiellini-a seh vanga an hrem hnua ram tana a match hmasa ber tur a ni dawn. Liverpool striker hlui chuan, "Tun hmaa ka khelh ṭhin dan tho khan ka khel ang a, ram tana ka rilru puthmang ang tho kha ka pu ang. Chu chu ka khelh dan a ni a, thlak ka tum lo. Finna tam tak chhar belh tur ka nei tih erawh ka pha lo," tiin ram tan theihtawp chhuaha a khelh tur thu a sawi.