World Twenty20 Semifinal lut hmasa ber New Zealand

Thawhlehni zan Twenty20 World Cup-ah Martin Guptill a parvul a, New Zealand batsman hian Pakistan an hmachhawnna inkhelah run 80 vaw chhuakin a team chu semifinal a hruai thleng.

Punjab Cricket Association Stadium, Mohali-a inkhelah hian bat hmasa zawk New Zealand-in over 20-ah run 180 siamin mi panga an hloh a, over 20 chhunga run 158 siama mi panga hlohtu Pakistan chu run 22-in an hneh.

Black Caps tan Indian Premier League team-te'n an duh loh Martin Guptill-a'n India leilungah ngei player ṭha a nihzia a pholang a, ball 48 a hmachhawnah run 80 a siam.

New Zealand tan Ross Taylor a che ṭha bawk a, ball 23 a hmachhawnah run 36 siamin a tawp thleng a dam a, batsman dangte'n Guptill an ṭawiawm
ṭhat loh karah a ding chhuak.

Pakistan-in an target an um ṭan tir lamah an khel ṭha a, opening batsman Sharjeel Khan chuan run 47 siamin a dinpui Ahmed Shehzad chuan run 30 a vaw chhuak bawk. The Shaheens-in bul ṭan ṭha mah se a tawp lamah an zuih ral a, a tlawm zawkah an ṭang.

New Zealand captain Kane Williamson chuan, "Kan khel
ṭha takzet a, Martin Guptill-a'n run tam tak a siam kha kan tan chuan a hlu takzet a ni. Bul kan ṭan ṭhat tawk loh avangin kan buai hman ṭep a, mahse over tawp lamah kan bowler-te'n an theihna an pholan avangin ka lawm takzet a ni," a ti.

Pakistan captain Shahid Afridi chuan, "Kane William-son-a leh a team-te lawmpui mai hi kan tih theih tawk chu a ni. A tir lam over ruk vel khel ṭha viau mah i la a hnu lamah beisei kan phak tawh lo a, kan khel ṭha lo takzet a ni," tiin an khelh ṭhat loh thu a sawi.

World Twenty20 zawh ruala international cricket-a chawlhsan mai theih thu sawitu Shahid Afridi chuan, "Zirtawpnia Australia nen kan inhmachhawn hunah eng nge thleng dawn kan hria ang. International cricket-a ka match hnuhnung ber tur a ni lo ang tih ka sawi thei lo," tiin a hmalam hun chungchang a sawi.

Pakistan tan semifinal luh beiseina a bo tawh tluk a ni a, ni-zana India leh Bangladesh result-ah an innghat thui hle. Nimin khan India leh Bangladesh bakah hian England leh Afghanistan an inhmachhawn bawk a, he chanchin buatsaih a nih lai hian an result kan hre hman lo.

Vawiinah inkhel en tur a awm dawn lo a, naktukah erawh inkhel pahnih a awm thung ang. Tlai dar 3:00-ah Pakistan leh Australia an inhmachhawn ang a, South Africa leh West Indies chu zan dar 7:30-ah an inhmachhawn bawk ang.