Miami-ah star langsar fuankhawm

Miami Open chu nimin aṭang khan Cran-don Park-a Tennis Center-ah khelh ṭan a ni a, first round khelh ṭan ni hian player langsar inlan nghal lo mah se he hard court tournament-ah hian khawvela mipa tennis player ṭha ber ber an tel dawn a ni.

ATP Masters 1000 tournament-ah hian kum 2012 hnua a vawi khat nan top 10 player an inlan kim dawn a, a sang 20 zing aṭangin 18 zet an inlan thei dawn bawk a ni. Champion lai Novak Djokovic chu player langsar ber tur a nih laiin a khup an zai avanga dam hlim Roger Fererer lo kir lehna tur a nih bakah world number 2 Andy Murray leh Rafael Nadal te hi mipui ngaihven an ni.

World number 1 Djokovic hian a zawna a vawi 11 nan Miami Open hi a khel dawn a, tun hnai kum nga chhunga vawi li champion thei a nih avangin player tawh khirh ber a ni ang.

Spanish star Nadal hi Miami Open-ah hian ṭum 12 a inlanna tur a ni tawh a, vawi li ngwt final-ah a chak lo zawkah a ṭang tawh. World number 5 hian a vawi khat nan title a beisei sang ve hle.