Mapuia Cricket League Chhinga Veng CC-in final an lut

Mapuia Cricket League 4th Edition-ah league round-a hma-hruaitu Chhinga Veng CC-in Qualifier 1-ah Chanmarians CC chu run 8-a hnehin final an lut.

Nimin vek hian Suaka Memorial Cricket Stadium-ah Eliminator Round khelh a ni a, Armed Veng CC leh Chaltlang CC inkhel chu ruahsur vangin khelh zawh theih a ni lo. Vawiin hian Eliminator Round hi khelhṭhat leh tur a ni a, a chak zawkin Inrinni hian Chanmarians CC nen Qualifier 2 an khel ang.

Ruahsurin inelna a tibuai lo a nih chuan final hi March 28, Thawhṭannia khelh tura ruahman niin Chhinga Veng leh Qualifier 2-a chak zawk an inkhel ang.

3C ṭha zawk Chhinga Veng

Nimin inkhel hi ruahsur vang-in over 8 chauh khelh a ni a, Qualifier 1-ah coin toss-a vannei Chanmarians-in vawm an thlang.

Chhinga Veng-in an bat a, run siam tam an tum luatah over 8 lekah wicket 9 hlohin run 55 an siam a, opener Saidul (14 runs) leh Abhay Jaishi (11 runs) te bak che ṭha an awm lo.

Chanmarians tan an target run 56 chu harsa niin lang lo mah se pitch awm dan nena thlirin awlsam tak erawh a ni lo. Opener Michael Lalrinkima'n run 3 chauh a siam a, a partner Pritam Gurung lahin run 10 chauh a siam theih avangin Chanmarians an talbuai avangin over 8-ah run 47 chauh an tlin a, wicket 7 hlohin an chak lo.