Tennis khawvel titi 'Hlawh Inang'

Kar hmasa khan Novak Djokovic chuan BNP Paribas Open title a la a, world number 1 nomawi chawi aia langsar zawk chu a thusawi a ni.

Indian Wells final khelh a nih hma Pathianni zing khan thuthar thehdarhtute hmaah Indian Wells tournament CEO Raymond Moore chuan hmeichhe player-te chuan mipate hip tura an inkhel ni maia a hriat thu a sawi.

Serbian thiampuipa Djokovic hian Moore thusawi hi pawmpui chiah lo mah se mipate chuan mipui ngaihven an hlawh vang leh entu an ngah bik avangin lawmman tam zawk an dawng a nih pawhin awm hlea a hriat thu a sawi chhuak a, heng thu pahnihte hian tennis khawvel boruak a luah mek.

United States Tennis Association (USTA) chuan kum 69-a upa Moore thusawi chu hmechhiate chuan 'itawm' an tum ti ang hialin an ngai a, hmeichhe world number 1 Serena Williams pawhin thusawi awm ang lo tak leh dik lo a nih thu a sawi chhuak bawk.

Moore a bang

Tennis legend Martina Navratilova chuan Moore hian a thusawi vang hian a hna a bansan lo a nih chuan hmeichhe player-te chuan Indian Wells hi an boycott duh hiala a rin thu a lo sawi chhuak bawk. South Africa pachal Moore hian a thusawi hnuah Indian Wells tournament CEO a nihna aṭangin a ban phah hial a ni.

Moore hian "Hmeichhe player chu ni ila Roger Federer leh Rafael Nadal te an pian vang hian Pathian hnenah lawmthu ka sawi ang, a chhan chu anni hian he infiamna hi an chawinungin mipui ngaihven turin an siam a ni,'' tiin a lo sawi tawh bawk.

Indian Wells tournament huaihawttu Larry Ellison chuan, "Ray hian CEO leh tournament director a nihna aṭanga a ban duh thu a sawi a, kei chuan a thusawi hi ka lo hrethiam ani," tiin a sawi.

Hlawh inang

Tunhma chuan mipa hian hmeichhia aiin lawmman atan pawisa an dawng hnem zawk ṭhin a, mahse WTA hmalak nain kum 2007 hnu lamah kha chuan Grand Slam pali Australian Open, US Open, French Open leh Wimbledon te chuan lawmman inang an pe. Masters events zingah Indian Wells leh Miami Open te hi lawmman inanga sem tute zinga mi an ni.

Kum 28-a upa Djokovic chuan, "Hmeichhiate chuan an phu ang ngeiin an duh an hmu tawh. Ka ngaihdan chuan lawmman hi fair taka sem awm a ni a, mipui ngaihven zawng, mipui hip leh ticket hralh hnem aṭang tein teh turah ka ngai," tiin mipui hip zawkah a in ngai. Hetihlai hian Novak hian a thu sawi hi mipui inhnial nan leh ngaihkawih theih tur a nih loh thu bakah a ngaihdan pakhat a sawi chuak ve mai a nih thu a sawi tel bawk.

Serbian tlangval thusawi hian sawi zui a hlawh a, American super star Williams chuan ngaihdan dik lo tak tiin a lo sawisel nghal a, "Kei hian fa nei ta ila, pakhat chu mipa a nih vang ngawtin ka duhsak bik lo ang a, hmeichhia a nih vangin ka dah hniam bik lo ang," a lo ti ve nghal chat bawk.

Mi tam takin an sawisel ṭhin chu mipa ten Grand Slam-ah 'best of five' hmanga inelna an neih laiin hmeichhiate erawh chuan 'best of three' hmangin inelna an nei thung a, dinhmun inanga dah theih lohah an ngai.

Nikum khan major tournament tel loin hmeichhe inelna WTA Premier events hi TV leh internet kaltlangin mi maktaduai 395 velin an ena ngaih a nih laiin mipa inelna ATP events erawh mipui maktaduai 973 vel zetin an ena ngaih a ni thung. 2015 Wimbledon final bik mipa inkhel kha maktaduai 9.2 velin an ena chhut a nih laiin hmeichhe inkhel erawh maktaduai 4.3 vel chauhin an thlir. Mipa inelna hian mipui a hip na hle tih a chiang.

Mahse, US Open bikah chuan mipa final kha maktaduai 1.6 velin an en laiin hmeichhe final kha maktaduai 3.3 velin an en thung a, tun hnai khum hnih chhung chuan hmeichhiain entu an ngah zawk ve ve. Federer, Nadal leh Djokovic te inkhel a nih lem loh chuan mipa hian ngaihven a hlawh fal bik lo ti ila a sual lo ang.

Swiss thiampuipa Federer hian Grand Slam title 17 ngawt a la a, Nadal hian 14 a chawi thung. Anni pahnih inelna hi khawvel tennis-a inelna ropui bera ngaih a ni hial a, mipuiin an ngaihven bik pawh hi a mak lo. Mahse, tunhnai kum hnih thum aṭang chuan Djokovic leh Murray ten an boruak an rawn vawi dai ta deuh a ni.