MFA Cup champion Chhinga Veng

Chhinga Veng FC tan 2015-16 season hi hun duhawm bik a ni a, Haier ADFA First Division Lea-gue-ah an champion hnuah Luangmual FC hnehin Mizoram Premier League Season 5 khel turin an inpet tling a. Season khar nan nimin khan Chhinga Veng FC hian Phulpui tlangval Lalṭanpuia goal hmangin Siaha FC an hneh a, 2016 MFA Cup-ah an champion.

Khawtetlang Field, Serchhip-a neih zawh tak MFA Cup-ah hian district pariat aṭangin club pakhat ṭheuh an tel a, inkhelh thiam ber Aizawl DFA aiawh Chhinga Veng FC-in an khingpui zawng zawng an hneh vek. Champion team striker Vanlallawma chu best player-a thlan a ni a, Siaha FC-in fair play award an dawn bakah an striker goal ruk khungtu MC Malsawmzuala chu top scorer a ni.

Goal khat a tawk

Final-ah Chhinga Veng FC leh Siaha FC te an fimkhur a, goal chance a tam lo. First half-ah Chhinga Veng tan Vanlallawma'n keeper Beikhai chiah a hma-chhawn hnuah a pet goal thei lo a, second half-ah Aizawl DFA aiawh tan Lalvensanga pet chuan keeper khum mah se goal zawnah a kal lo.

Siaha FC-in hun pangngaiah chak theihna chance an nei a, MC-a ball tauh chuan goal ban a per bakah extra time first half-a Dinthar FC striker hlui ball pet
ṭha zet chu Chhinga Veng keeper Vanlalawmpuia'n a dan sak.

Khuallian tlai vangin inkhelh ṭan hun dar 2:00 chu tlai dar 3:20-ah ṭan chauh a ni a, extra time-ah hian khua a thim tawh hle. Hun tawp hma hretin B. Lalnuntluanga corner pet chu Siaha defender-in tauh chhuak mah se Ṭp-a'n goal-ah petin inkhela goal awmchhun a ni.

Lawm leh lawm lo

Chhinga Veng FC manager Lalthanzama Vanchhawng chuan, "Pathianin kan discipline ṭhatna leh kan thawhrimna te mal min sawm a, tun season-a inelna pathuma hlawh-tlinna kan hmu thei kan lawm takzet a ni. Chhinga Veng leh kan thlenna IOC, Serchhip aṭangin ṭawiawmna ṭha tak kan nei a, an chungah kan lawm takzet. Kan champion theih nan coach Lalremruata remhriatna chu sawi hmaih theih a ni lo a, min sponsor-tu Pran leh JSJ Fitpro hming lamrik hi kan tih makmawh a ni bawk," tiin a sawi.

Chhinga Veng-in MFA Cup an hlut a, Aizawl aṭangin 2-wheeler leh 4-wheeler hmangin mi 200 vel zet in Serchhipah an pan a, nomawi an au chhuak. MFA Cup nomawi hi Chhinga Veng hlawhtlinna tifamkimtu a ni a, tualchhung football tuipha lo tana hriatthiam phak a ni lo.

Chhinga Veng hian Aizawl DFA-in mumal taka first division league an buatsaihna hmasa berah nomawi an chawi a, second division kaithar tan chuan thil awlsam a ni lo. MPL5 Qualifier-ah Ramhlun North tluk lo mah se MPL5 Playoff-ah Luangmual FC an hneh a, tun hmain MPL pasarihna playoff-ah an chak vek avangin Chhinga Veng hian record an siam a, an thlen chin hi chhinchhiah tlak a ni.

Siaha FC coach Beirona chuan, "Inkhelh hun tlai kha a pawi takzet a ni. Goal lut lai kha a thim tawh avangin ka awmna aṭang chuan ka hmu thei tawh lo a, keeper tan tih theih a awm lo," tiin a lungawi loh thu Vanglaini palai a hrilh.

Champion Kalkawng

GROUP STAGE

March 15, Thawhlehni

Chhinga Veng FC 10 - 1 Young Learner's FC

CVFC : Lalhmunsiama 44'; Hmingthanmawia Hmar 51'; Lalthlamuana 59', 71', 72', 86'; Vanlalhriata 63'; B. Lalnuntluanga 62'; Orvielle PF Todd 69'; Lalsawmzela 70'

YLFC : Johnly HC VL Sawmthanga 49'

March 17, Ningani

Rengkhawpui FC 1 - 4 Chhinga Veng FC

RFC : Laltlanhlua 74'

CVFC : C. Vanlallawma 41', 47', 66'; Lalvensanga 71'

March 19, Inrinni

Chhinga Veng FC 1 - 0 Siaha FC

CVFC : Hmingthanmawia Hmar 30'

SEMIFINAL

March 21, Thawhṭanni

Chhinga Veng FC 2 - 2 New Serchhip FC

CVFC : Vanlallawma 42', 48'

NSFC : Henry Lalhruaitluanga 63', 67'

Penalty shootout-ah Chhinga Veng 4-3 in an chak

FINAL

March 23, 2016

Chhinga Veng FC 1 - 0 Siaha FC

CVFC : Lalṭanpuia 120'

MFA Cup Champion tawhte

Kum Champion

1999 1st Bn MAP

2000 Vaivakawn

2002 Dawrpui Vengthar

2003 1st Bn MAP

2004 FC Kulikawn leh

MRP Joint Holder

2005 FC Kulikawn

2006 1st Bn MAP

Kum Champion

2007 FC Kulikawn

2008 Lungei

2009 Khawzawl

2010 RCFC

2011 1st Bn MAP

2012 SYS FC

2013 Chanmari FC

2014 Champhai FC

2016 Chhinga Veng FC