India captain hlui Mahesh Gawli hoin Germany kal tur inbuatsaih

U Dream-in Ger-many-a football zir tura an thlan chhuah Mizo naupang rual 15-te chuan tunlai hian Aizawlah inpuahchahna an nei mek a, India captain hlui leh Germany-a India naupangte enkawltu tur Mahesh Gawli hoin training an nei.

India defender langsar ber ni ṭhin Gawli leh U Dream lama sports manager Gurbaksh Singh-te chu Aizawlah an cham mek a, Germany-a Mizo footballer-te kal dan tur an buaipui a, training an nei bawk.

A vanglaia Indian defender ṭha bera chhal ngam Gwali hian nikum khan football a chawlhsan hnuah U Dream hi zawmin coach turin a inbuatsaih a, Germany-ah naupangte kaihruaitu ber a ni a, Bundesliga club Hoffenheim hnuaiah coaching a zir mek a, India aṭanga naupang kalte kaihruaitu a ni.

U Dream lam hian thil a kal tluan chuan April-ah emaw May-ah emaw Mizo naupang pali chu Germany-ah hian an tir phawt dawn a, naupangte hian Hoffenheim hnuaiah training an nei ang. Germany-a football zir tur an nih piah lamah an lehkha zirna thlengin an enkawl zui dawn a ni. Kumin chhungin Mizo naupang dangte pawh Germany-ah hian Hoffenheim hnuaia football khelh zir turin an tir leh dawn a ni.

U Dream hi Mizoram Football Association nen thawk dunin Mizoramah football project lian zawk kalpui tumin an inbuatsaih mek a, an ruahman anga thil a kal tluan chuan Mizo naupang dangte tan pawh Germany lama football zirna tur kawng hawn zel an tum. Naupangte zin veivahna, an awm man, ei leh in leh senso awm tur zawng zawng hi U Dream hian an tumsak vek dawn a ni.