India national football team captain Aizawl FC hmachhawn châk JEJE
India-in Asia football po-wer-house Iran an hmachhawn hunah Hnahthial tlangval Jeje Lalpekhlua'n captain armband a hreng dawn. Mizo zinga India senior team tana captain hmasa ber a ni ang.
Zanin dar 8:00 hian Tehran-ah Iran leh India ten 2018 FIFA World Cup Qualifier an khel dawn a, Mohun Bagan striker hi ram tana a fehchhuah avangin March 26-a I League champion lai leh Aizawl FC te RG Stadium-a an inkhelh hunah a inlan thei dawn lo. Jeje-a chuan Mizoram chhung ngeia I League a khel thei lo tur chu pawi a tih thu Vanglaini palai a hrilh.
Mizo pahnih
India team-ah Jeje bak-ah Bengaluru defender Lalchhuan-mawia te an tel a, Chaltlang tlangval Malsawmzuala erawh probables-ah telh ni mah se final squad-ah telh a ni lo. English coach Stephen Cons-tantine chuan team captain Sunil Chhetri chu inhliam vangin a chhawr thei lo a, Bengaluru captain aiah Jeje hi captain-ah a ruat.
Mohun Bagan striker Jeje hi ram tan vawi 32 a inlan tawh a, tuna India squad-a a tluk loh chu Sunil Chhetri (88) leh Subrata Paul (64) te chiah an nih avangin rampum huap captain atana Mizo tlangval an ruat hi a mak lo.
Iran lam
India team-in Thawhṭanni khan Iran an thleng a, SAFF Suzuki Cup an champion hnua an match hmasa ber tur a ni. India team hi an boruak ṭhat lai tak a ni a, FIFA World Cup Qualifier-ah Guam chiah an la hneh avangin Group D mawngphahah awmin World Cup khelh beiseiawm tawh lo mah se inelna hi AFC Asian Cup 2019 khel tur zawnna a nih tel avangin inkhel pawimawh a la ni.
Iran hmachhawn huna India captain tur Jeje chuan, "Ka lawm khawp mai. Pathian hnena lawmthu sawi mai lo chu tih theih vak a awm lo. Ka hmabak hi a phurawm rualin a huphurhawm a, mawhphurhna a sang bawk avangin rim taka thawh a ṭul a ni. Mizo mipuite ṭawngṭainaah minlo hre reng turin ka chah duh a ni," tiin Vanglaini palai a hrilh.
Mizoram lam
Jeje khelhna I League cham-pion Bagan hian National team-ah defender Pritam Kotal leh midfielder Pronay Halder te an thawh tel bawk a, Indian player ṭha pathum bakah Haiti international Sony Norde tel loin Mizoram an rawn zin dawn.
Bagan hian vawi 11 khelhah point 25 hmuin hmahruaitu a ni a, champion thei dinhmunah an ding. Aizawl FC erawh vawi 11 khelhah point kua chauh an hmuh avangin tla thei dinhmunah an ding thung. Aizawl FC hotute pawhin Mariners nena an inkhel tur hi a pawimawh tih hriain entu neih tlem an duh lo a, ticket man pawh Rs 200, Rs 100 leh Rs 50-ah an tihniam.
Aizawl FC leh Bagan inhma-chhawn tur pualin Vanglaini palaiin Jeje-a a kawm a, India striker chuan a tel lo pawha Mariners ṭhat thu a sawi.
Hei hi India captain Jeje thukhawchang chu a ni e:
Mizorama inkhelh
Mahni ramah ngei Mizo mipui leh ka chhungte hmaa khelh hi professional ka luh tirh aṭanga ka lo suangtuah ve ṭhin kha a ni a, ka châk khawp mai. A pawimawh lam zawkah khelh a ngai ta si a, duhthlang thei ka ni lo.
Pathian zarah damin kan awm ang a, season lehah chuan Mizo mipui leh ka chhungte hmaah ngei ka khelh ve theih ka beisei.
Player pali tel loin
Tunlai chu kan team khelhṭhatlai a ni a. I League leh AFC Cup-ah chak loh kan la nei lo a, AFC Champions League-a Shandong Luneng chiah kha tun season-ah hneh loh kan nei. Norde, Pronay leh Pritam te nen tel thei dawn lo mah ila kan squad hi a chhah ṭhat avangin tupawh hi khel se ṭha taka khel thei vek an ni. March 24 hian an rawn chho dawn a, Aizawl FC hmaah pawh ṭha takin an khel thei ang.
En bik tlak
Sony Norde hi a game a hmuhnawm ka ti a, Mizo mipui-in a takin hmu ve ngei se ka ti hle. Amaherawhchu a rawn kal theih dawn tak si loah chuan Katsumi Yusa hi en bik tlak a ni. Japanese midfielder hi a taima a, Mizoten zir tur nasa tak kan neiin ka hria. Winger a ni a, a defensive a ṭhat bakah a hnathawh tur a hnehsawh thei hle. A tlan reng peih a, pla-yer naupang zawk ten a game aṭangin thil tam tak an zir thei ang.
Coach tel loin
Coach Sanjoy Sen hi an hrem vangin inkhelh laiin kan bulah a awm thei lo a, a dan chu a dang deuh. Chutihrualin practice leh game plan amahin a tih vek tho avangin buaina tur a awm lo. Coach hian assistant coach te hnenah thu pawimawh a hrilh vek thei a, tun dinhmunah chuan coach aiin player-te hi kan paiwmawh zawkah ka ngai.