Footballer ropui Cruyff khawvelin a chan ta

Netherlands, Ajax leh Barcelona legend Johan Cruyff chu chuap cancer vangin kum 68 a upa niin Ningani khan Barcelona-ah a thi.

World of Johan Cruyff website chuan, "Johan Cruyff (kum 68) chu March 24, 2016 khan a chhungte awmpuina hnuaiah hahdam leh thlamuang takin a chenna Barcelona-ah cancer natna vangin a thi a, hun hrehawm an tawh lai hian Cryuff-a chhungte mimal zahawmna zah sak turin kan ngen," tiin thuchhuah an siam.

April 25, 1947

Amsterdam-a AFC Ajax stadium aṭanga minute nga kal lekah Hendrik Johannes (Johan) Cruijff chu April 25, 1947 khan a lo piang a, Cryuff-a pa Hermanus Cornelis Cruijff hi football ngaina tak a ni. Kum 1959 khan lungphu chawl vangin Cryuff-a'n a pa a chan a, football hmanga a pa hming chawi nung zel turin rilru a siam.

Ajax-a hmunphiata inhlawh Cryuff-a nu Petronella Bernarda Draaijer tan amah ringawta an nitin eitur baka Cryuff-a mamawh thawhchhuah a harsat avangin Ajax football pitch enkawltu Henk Angel chu a pasal pahnihna atan a nei a. Cryuff-a'n a football zin kawngah a pa chu amah fuihtuah a hmang a, a tum ram a thlenna kawngah a nu leh a pahrawn te thawhrimna leh hmangaihna a pawimawh takzet bawk.

Cryuff turn

1974 World Cup group stage-a Westfalenstadion, Dortmund-a thil thleng pakhat chuan football hmel a tidanglam a, chu chet dan hmang chu 'Cryuff turn' tih a ni.

Dutch no. 14 chuan a ke dinglam chhung lam chuan ball chu ke veilam hnung lam hrul chuan a kheng let a, 180 degree-a inher nghalin Sweden defender Jan Olsson a hawi hai hle. Inkhel entu mipuiin mak tiin an mit an tuai a, a taka thleng ngei a ni si. Mahni hming chawi ngeia player bum dan hmang neitu chuan khaw-vel a chhuahsan ta a, a chanchin sawi tur a va tam si em.

Total Football

Johan Cruyff hi 1974 World Cup-a Netherlands final thlenpuitu zinga mi kha a ni a, khawvel hriatzui dan erawh coach Rinus Michels-a'n football khelh dan thlak hlawk tura a duan 'Total Football' lanchhuahtirtu player pawimawh lawr lak a ni.

Dutch legend hian Ajax-ah bul ṭanin Eredivisie title vawi riat a lak pui a, kum 1971 leh 1973 chhungin Dutch club hi European Cup a zawnin vawi thum a lakpui bawk. Kum 1973-ah Barcelona zawmin kum nga chhungin La Liga leh Copa del Rey champion pui mah se kum 1988-a coach anga a luh hnuah sulhnu a hnutchhiah tam zawk.

Kum 1985 khan Ajax-ah coaching career a ṭan a, KNVB Beker (Dutch Cup) vawi hnih leh UEFA Cup Winners' Cup a champion pui hnuah Catalan club-ah a kir. a. Barcelona hi kum riat a enkawl chhungin league title vawi riat a lakpui bakah European Cup-ah a vawi khat nan a champion pui a, player pawimawh zingah coach ropui ni zui ta Pep Guardiola a tel.

Cryuff hian chak leh lian ṭha an ngaih pawimawhna La Masia kalhmang thlakin khawvelin Xavi, Andres Iniesta leh Lionel Messi te an hmuh theih phah. Champions League-a Barcelona vawi hnih champion puitu coach Guardiola chuan, "Football khawvela ka thil tih chu Johan Cryuff aṭanga ka thil zir hlan chhawng zel hi a ni. Cryuff hian biak in ropui tak a sa a, kan hna chu uluk taka enkawl leh chei ṭhat a ni," tiin amah enkawl ṭhintu chu a ngai pawimawh thiam hle.

Footballer ropui Cryuff chuan, "Thluak hmangin football khelh tur a ni a, ke chu thluak puitu chauh a ni," tiin thiam takin football khelh dan tur thu hmangin a sawi a, amaherawhchu thu hian football tana a thawh hlawk zia a sawi thiam si lo.

Football inelnaa ngaihhlut ber FIFA World Cup-ah champion lo mah se Cryuff hian 1974-a FIFA World Cup Golden Ball a dawn khan phu lo ti reng an awm lo. Dutch Footballer of the Year-ah vawi thum thlan a ni tawh a, a aia ropui Ballon d'Or-ah vawi thum tho thlan a ni.

A famkim lo

Khelmual chhungah sawi-selna tur a awm lo niin sawi ṭhin mah se khelmual pawnah erawh meizial lakah a insum thei bik lo. Mei a zuk nasat avangin kum 1991 khan lung lam ṭha lo vangin zai a lo tawk tawh a, hemi hnu hian zial a nghei hmak.

A harhchhuah hnuah Cryuff chuan, "Football hian ka mamawh zawng zawng min pe a, ka mei zuk nasat luatah ka chan vek ṭhelh a ni," tiin a sawi. October 2015 khan chuap cancer a nei tih hriat chhuah a ni a, thla liam ta kha chuan, "Result a ṭha lam zel a ni a, cancer nena kan inbeihna first half-ah 2-0 in hma ka hruai mek," tiin cancer natna hi ka hneh ngei dawn a ni tiin sawi mah se a hneh zo ta bik lo.

Football khawvelin Cryuff a sun

Johan kan hmangaih che. Thlamuang takin chawl ang che - FC Barcelona

Johan ka hria hi ka inchhuang a ni. Player ropui zinga mi a ni a, amah hi player ropui a ball chan apianga mipui tana hmuhnawm chhawp chhuak ṭhin a ni. Khelmual chhunga a awm tawh chuan mipuiin beiseina an nei a, football a hmangaih a, infiamna a ngaina a, nunna a ngai hlu a ni.

- Sir Bobby Charlton

Ka coach hrawn tawha ṭha ber leh ka ṭhian
ṭha ber thi hian minti ngui takzet a ni. Ka thinlung­ah hmun pawimawh tak a chang reng ang.

- Ronald Koeman

Skinny, kan theihnghilh lo ang che

- Diego Maradona (Cryuff hi a inkhelh hun laiin a pan thler avangin Skinny tih ṭhin a ni)

Johan Cryuff-a thi hian min ṭhawng a ni. Ka tan chuan ṭhian ṭha a ni satliah lo a, ka unaupa a ni.

- Franz Beckenbauer

Cruyff kha player hmuhnawm bik a ni a, player ropui zinga ami a ni. Amah kha khelh dan nalh chhinchhiahna a ni a, football history-ah sulhnu ropui tak a hnutchhiah a ni.

- Gianni Infantino, FIFA President

Rinhlelhna tur awm miah loin ka tan chuan coach ṭha ber a ni. A thil min zirtirte kha damchhungin ka hre reng ang. - Romario

Min chawk phurtu leh zirtirtu ṭha a nih avangin Johan ka lawm e. Football khawvel-a Netherlands hmun pawimawha i dah avang leh kan tana kawng sialtu i nih avangin kan lawm e. Thlamuang takin chawl ang che. - Ruud Gullit

Football legend pakhat chuan mual min liamsan leh ta - Lionel Messi

Football legend dik tak kan chan ni a nih avang­in football chhungkaw tan chuan chhiatna a ni. Hun harsaah Johan-a chhungte kan hre reng e.

- Louis van Gaal

Player leh coach angin a ropui a, a hlawhtlinna kawngah tluk phak loh a nei lo. Legend tih
ṭawngkam hi ṭul loah kan hmang nasa lutuk a, ani hi chu legend dik tak a ni. - Roy Hodgson

Player ropui Johan Cruyff-a thi hian minti hnual hle. Amah hi player, coach leh zirtirtu ṭha bik a ni a, pa kawm nuam tak a ni bawk.

- Jurgen Klinsmann

Portugal ka chhuahsan hnua ka coach hmasa ber a ni a, coach ṭha ber zinga mi a ni. Football khawvelin kan chan nasa hle a ni. - Luis Figo

Theihngilh leh tur atan chuan i ropui lutuk a ni.

- Patrick Kluivert

Mak kan ti a, mittui hial a tla. Kan zinga a tel tawh lo tih ngaihtuah hi a harsa a ni.

- Ronald de Boer

Player leh coach angin kan club history i ti­dang­lam a ni. Johan, kan lawm e.

- Josep Maria Bartomeu, Barcelona President

Johan hi ka naupan lai aṭanga ka ngaihsan a ni a, ka player entawn a ni a, ka ṭhian a ni bawk.

- Michel Platini

Jersey no. 14 hian ngai a awh leh tawh lo ang.

- Xabi Alonso

Player chhinchhiahtlak a ni. Engtik hunlai pawh ni se player ṭha panga zinga mi a ni. Coach ṭha ber zinga mi a ni a, a danglam bik a ni.

- Martin Tyler, Sky Sports commentator