Iran hmaah India an tlawm

Mizo tlangval Jeje Lalpekhlua'n India tana captain armband a hrenna hmasa berah hnehna a chanpui zo lo a, Tehran khawpuia World Cup qualifier match-ah India chuan 4-0 in Iran an hneh lo.

First half-ah Iran hian goal khat chauh khung mah se second half-ah erawh goal thum lawih an khung. Real Madrid manager hlui Carlos Queiroz-a kaihhruai team tan hian Haji Safi chuan penalty aṭangin goal hnih a khung a, Sardar Azmoun leh Alireza Jahan-te'n goal khat ve ve an khung bawk.

India tan captain Jeje-a bakah Mizo tlangval Lalchhuanmawia Fanai a inlan bawk a, Lengpui tlangval hian inkhel bul ṭan lo mah se minute 64-naah khelmual chhungah tlan luhtir a ni.

Hnahthial tlangval Jeje-a chuan inkhel chungchang sawiin, "Theihtawp chhuahin kan khel a, chak lo mah ila kan game-ah hmasawnna hmuh tur awmin ka hria. Kan tihsual vangin penalty vawi hnih lai kan chawi a, kan inzirna tur a ni. Turkmenistan nen kan inhmachhawn hunah chuan kan insiamṭha tawh ang," tiin Vanglaini palai hnenah a sawi.

India hian March 29 zan dar 6:00-ah Turkmenistan chu World Cup qualifier match-ah an hmachhawn leh ang a, Kerala state-a Kochi khawpuia an inkhel tur hi Sony Six-ah a en theih ang.

Iran coach Carlos Queiroz chuan Jeje-a hoa khel team naupang India fakin, "Dik taka sawi chuan India team khan min ṭhawng a ni. Awlsam taka chak turah kan inngai a, mah se kan inhmachhawn hmasak aiin an khel ṭha zawk," tiin an khingpui team a fak.

India coach Stephen Cons­tantine chuan, "Team nau­pang tak ka hruai a, Udanta Singh-a'n ram tana a match hmasa ber a khel bawk. Iran kha chelh din kan tum a, mah se kan tihsual kan tuar a ni," tiin penalty vawi hnih an chawi chu pawi a tih thu a sawi.