Zarkawt aiin Khatla an sang hret

Mizoram Super League Season 2 semifinal hnuhnung zawkah Khatla TBL-in Zarkawt Serpents chu 71-66 in an hneh hram. March 1, Zirtawpni zan hian Hawla Indoor Stadium-ah Game 2 khelh a ni dawn a, TBL hi an chak nawn thei a nih chuan final an lut ang.

A la fuh lo

Khatla TBL-in semifinal game 1-ah Serpents hneh mah se chak turin vanneihna an mamawh. Nilaini zan inkhelah Khatla-in ṭum dang angin ṭantu an nei ṭha lo a, India captain Vishesh Bhriguvanshi leh Pratham Singh bakah City Police-a tling thar Gospel Lalthanmawia leh R. Lalmalsawma te an chhawr theih loh bawk avangin Zarkawt Serpents hmaah an talbuai hle.

Zarkawt Serpents hi an coach Arvinder Singh Bawa-in a tel pui tawh lo a, Guwahati center Sahil Sharma a awm tawh lo bawk. State pawn player tel loin Serpents-in bul an ṭan
ṭha zawk a, Champhai tlangval Hmingthanmawia a langsar ber.

Khatla TBL thiampuipa H. Laldinsanga chu player naran a ni a, Vanlalmuana erawh Serpents ten dan harsa an ti hle. Dawrpui Vengthar tlangval zarah Khatla-in halftime-ah 31-23 in hma an hruai a, an chungnung.

Third quarter-ah Zarkawt-in an veng tlangval Lalsangkima leh Chaltlang tlangval Jonahtan Vanlalhriatpuia hmangin an tho chhuak a, Serpents hian quarter thumnaah hian hun chanve hma lama an khung zat point 23 an score. Amaherawhchu Khatla-in an vengchhungah chhuan tur an nei ve tho a, Vanlalnunsanga a hun taka a rawn rah zarah hnehna an chang hram.

Khatla TBL-in an khelhfuh loh zanah hnehna an chang thei a, Zarkawt Serpents erawh inenfiah an ngai thung. Khatla aiin Zarkawt-in ṭantu an nei ṭha zawk a, Serpents chak lohna chu court chhungah a ni.

Serpents guard Sangkima khel ṭha mah se inkhelh tawp lama a tihsual a pawi thui a, hun pawimawha Champhai guard Hmingthanmawia bench-a an
ṭhuttir rei lutuk chu a fuh tawk lo niin a lang. Zarkawt Serpents chak thei tur an ni a, amaherawhchu TBL aiin chak châkna an nei tlem zawk a, semifinal-ah an lungawi niin a lang.

A la chiang lo

Khatla TBL coach H. Laldin-sanga chuan, "Kan inhnehtawk tih chu Game 1-ah a lang a, final ka la lut chiang lo. Serpents hi team ṭha an ni a, chuvangin final lut turin kan chesualna lai kan siamṭhat vat a ṭul a ni," tiin Vanglaini palai a hrilh.

Karleh lam hian MSL semi-final leh relegation playoff khelh chhunzawm a ni dawn a, tun dinhmunah chuan Tuikual South leh Khatla TBL te final-a inhmachhawn turin an dinhmun a
ṭha a, MSL khel zel thei dinhmunah Zarkawt BCA an ding bawk.