West Ham player nghet Lanzini

Season thara Champions League khelh tum ngam West Ham chuan loan-a an hawh lai Argentine midfielder Manuel Lanzini chu United Arab Emirates club Al Jazira aṭangin a nghetin an la lut.

Kum 23-a upa Lanzini hian season khat chhung atan Hammers hi a zawm a, tunah chuan kum li chhung cham nget turin contract a ziak a, an inremna zat erawh tarlan a ni lo thung.

Lanzini chuan, "He hmunah hian ka hlimin nuam ka ti em em a, ka in ang maiin ka ngai. Ka theihna sang ber pholang tura theihtawp chhuah zel hi ka duhdan a ni," tiin a sawi.

Lanzini hian tun season-ah league match 18 khel tawhin goal nga a khung tawh a, Inrinni liamta a Chelsea nen 2-2 a an inhnehtawk ṭum khan goal khat a khung nghe nghe.

West Ham Boss Slaven Bilic chuan season tharah a player pawimawh a chhawr chhunzawm zel thei dawn niin a lang a, Dimitri Payet leh Cheikhou Kouyate te pawhin tun hnaiah club-ah an rinawmzia lan tirin contract an lo pawt sei tawh a ni.