Chile lakah Argentina-in phuba la
Nimin zing khan Argentina chu nikum Copa America final-an hneh loh Chile khel turin an zin chhuak a, Angel di Maria leh Gabriel Mercado te goal khung hmanga 2-1 a hnehna changin 2018 FIFA World Cup qualification (CONMEBOL)-ah palina dinhmun an luah ve leh ta.
Santiago-a inkhelah Chile midfielder Matias Fernandez chu inkhel ṭan aṭanga minute sarihna lekah hliam vangin thlak ngai mah se midfielder Felipe Gutierrez chuan minute 11-na lekah goal hmahruai a khung. World Cup qualifying match li an khelh tawh aṭanga vawi khat chiah hnehna la chang thei Argentina dinhmun a ṭha lo hman hle.
Mahse, Argentina hian si an phur rei lo. Minute 20-na lekah Paris St-Germain winger Di Maria chuan defender pathum karah hnai ang reng tak
aṭangin Chile goalkeeper Claudio Bravo dan hman lohin a thlawh lut a, captain Lionel Messi siamsak hmangin defender Mercado chuan minute 25-naah buai nuaih kar aṭangin an goal hnihna khungin goal dang a lut zui tawh lo.
Chile coach Juan Antonio Pizzi-a'n team a vawi khat kaihhruainaah midfielder Arturo Vidal a inlan loh bakah forward Eduardo Vargas chu hrem a nih vangin a chhawr thei lo a. Arsenal hmatawng Alexis Sanchez leh a ṭhianten Argentina tlarhnung an su nghing zo meuh lo.
Argentina hian an match hmasa lamah Ecuador hneh loin Brazil leh Paraguay-te an inhnehtawk pui a, an match hnuhnung zawkah Colombia an hneh thung. Chile an hneh leh theih avang hian table-ah palina dinhmun an luah chho ve leh tawh. March 29 Thawhlehni khian World Cup qualifying-a an match rukna an khel leh dawn a, Bolivia an lo mikhual ang.
Messi a lawm
Barcelona thiampuipa Messi chuan, "Team ṭha tak mai inkhelh harsatna hmunah kan hmachhawn a, chutah sikhat kan phur hmasa bawk. Mahse kan theihna zawng zawng sawm khawma kan beih let avangin hnehna kan chang thei hi a lawmawm. Thawhlehniah Bolivia kan hmachhawn zui leh dawn a, kan khelmuala khel tur kan nih avangin kan mikhual hnenah hian point khat pawh kan pe thiang lo," tiin a sawi. Argentina captain hi khup hliam vanga a buai reng avangin kuminah ram tan a inkhelh vawi khatna chauh a ni.
Colombia chak
Inkhel dangah beisei anga qualifying khel ṭha bik lo Colombia chuan James Rod-riguez, Carlos Bacca leh Edwin Cardona te goal khat ṭheuh khung hmangin Bolivia chu 3-2 in an hneh hram.
Colombia hian an match hmasa lamah Peru lo hneh tawh mah se Uruguay leh Argentina an hneh loh avangin an dinhmun a ṭha lo hman hle a, Bolivia hian an beiseina siam thar lehin point sarih hmuin table-ah pasarihna dinhmun an luah mek. March 29 khian Ecuador an lo mikhual ve thung ang.