Afghan hnehtu England an vannei

England chuan Ni-laini zan khan inkhel hmuhnawm takah Afghanistan chu run 15 in an hneh hram a, Afghan pla-yer hmaah England an talbuai teuh hle. England hian over 20-ah run 142 siamin mi pasarih an hloh a, Afghan bowler-te an ngam lo hle. England tana run siam hnem ber Moeen Ali chuan run 41 siamin a tawp a thleng, a ṭhiante aṭangin thlawptu erawh a nei ṭha tawk lo.

Afghanistan batsman zingah run 35 siamtu Shafiqullah a khel ṭha fal a, a tawp thleng a dam. Mahse, pakhat chet ṭhatin awmzia a nei thui lo a, team huaisen Afghanistan hi a tlawm zawkah an ṭan a ngai ta tho a ni.

Ningani zanah in-khel a awm lo a, ni-min-ah erawh inkhel pahnih a awm thung. Inkhel hmasa zawkah Pakistan leh Australia an inhmachhawn a, inkhel hnuhnung zawkah South Africa leh West Indies inhmachhawn thungin he chanchin buatsaih a nih lai hian an result kan hre hman lo.

Vawiinah inkhel pahnih a awm dawn a, tlai dar 3:00-ah Bangladesh leh New Zealand an inhmachhawn ang a, zan dar 7:30-ah Sri Lanka leh England an inhmachhawn thung dawn a ni.

Pathianni tlai dar 3:00-ah Afghanistan leh West Indies an inhmachhawn bawk ang. Windies hian vawi hnih inkhel an hmachhawn tawhah hnehna an chang ve ve a, Afghanistan-in chak hmel an la hmu lo thung.