Spain tan Aritz Aduriz

Athletic Bilbao veteran striker Aritz Aduriz chu kum nga leh a chan ve dawn hnuah European champion Spain tan koh leh a ni a, Ningani zan khan Italy nen friendly match an khelh ṭumin goal pawimawh khungin 1-1 in an inhnehtawk.

Italy khelmual Stadio Friuli-a inkhelah goal a lut har a, Azzurri tan Napoli winger Lorenzo Insigne chuan minute 67-naah goal hmahruai a khung. Mahse, Alvaro Morata ball tauh chu Gianluigi Buffon-a'n lo dang mah se a per let chu Aduriz hian hnai set sawt aṭangin a chhuih lut a ni. Euro 2016 khelh tuma inbuatsaih ram pahnihte hian goal dang an khung zui tawh lo.

Kum 35-a upa Aduriz hian tun season-ah Bilbao tan inelna hrang hrangah goal 31 a khung tawh a, Euro 2016 khel turin Vicente del Bosque-a mit tlung ngei turin theihtawp a chhuah mek a ni. Italy lama goal a khung hmain Aduriz hian October 2010 khan Lithuania nen an inhmachhawn ṭumin substitute bench aṭangin a lo tlan lut ve tawh bawk a ni.

Spain hi Group D-ah Croa-tia, Czech Republic leh Turkey te nen an awm ho a, Italy hi Belgium, Republic of Ireland leh Sweden te nen Group E-ah an awm ho thung a ni.

Euro zawh ruala Italy coach aṭanga chawl tur Antonio Conte chuan, "Hnehna chan ka duh avangin kan result-ah ka lawm lo. Goal kan chhuahna kha set-piece aṭang bawka inṭan a nih avangin insiam ṭhat kan ngai. Euro khel turin group khauh taka kan awm a, knockout round lut tur chuan ṭha taka inbuatsaihna neih chhunzawm a ngai a ni," tiin a sawi.

Spain coach Del Bosque chuan, "Aduriz kha a khel ṭha hle a, Spain khelh dan takin a khel chhuak thei nghal a ni. Ball kan chan tam loh bakah Italy khan keini aiin goal chance an ngah zawk bawk a, Euro 2016 hma chuan kan insiam ṭhat hman ka beisei," a ti.