Inrinni zanah Germany vs England

Khawvela football ngaina berte zinga mi ram pahnih Germany leh England te chu zanin dar 1:15 hian Olympiastadion, Berlin-ah friendly match an khel dawn. Ram pahnihte hi inelna hrang hrangah vawi 30 an intawnna tur chiah a ni ang.

German khawpuia team pahnihte inhmachhawn hnu-hnung ber kum 2008 khan Matthew Upson leh John Terry te goal khung hmangin England-in hnehna an chang a, kum 2013 khan London-ah Arsenal defender Per Mertesacker goal khung hmangin Germany hian hnehna an chang let ve thung a ni.

Ram pahnihte an intawn hnuhnung vawi 13 aṭangin Germany hian vawi sarih hnehna an chang a, England hian vawi nga hnehna an chang thung a,
ṭum khat chu an inhnehtawk.

Roy Hogdson-a'n hliam vangin captain Wayne Rooney, Raheem Sterling, Joe Hart leh Ryan Bertrand te a chhawr thei dawn lo a, tlarhmaah Jamie Vardy, Harry Kane, Theo Walcott leh Danny Welbeck te chu hman theih turin an inpeih thung.

Joachim Low-a'n Euro khel tur team din tumin an match hnuhnunga France hmachhawn zinga ṭangin player a siksawi lo. Mesut Ozil bakah Arsenal player hlui Lucas Podolski pawh koh a ni. Bayer Leverkusen defender Jonathan Tah chu hming thar awmchhun a ni.

World champion Germany hian Euro qualifying-ah Poland chu point khat chauha lehpelin hmahruaitu an ni hram a, hetihlai hian England erawh match 10 an khelh aṭanga 100% chak record nei awmchhun an ni thung.

Eng nge an sawi?

England manager Hodgson chuan, "Tunah chuan Euro khel tur player ka la thlang fel lo a, Germany nen kan inhmachhawn zawhah hi chuan a riruang tur chu a lang tawh ang," a ti.

Germany manager Low chuan, "Ka ngaihdan chuan keini tih lohah chuan Spain, Belgium leh France te hi Euro 2016 champion nomawi chawi thei tur zinga mi an ni. Kan inkhelh tur hi a pawimawh, a chhan chu team pahnihin kan theihna sanzia kan pholang dawn a ni," tiin a sawi.

Starting XI tura beiseite

Germany

Neuer – Ginter, Mustafi, Hummels, Hector – Khedira, Kroos – Muller, Ozil, Reus – Gotze.

England

Forster – Walker, Cahill, Smalling, Rose – Lallana, Dier, Alli – Welbeck, Kane, Vardy.