Tlai dar 2:30-ah Mizo tan rawn Aizawl FC vs India champion Bagan

Tun hnaia India club ṭha ber thlan tur nise Mohun Bagan khing phak an awm kher lo ang - I League champion hi RG Stadium, Mualpuiah an rawn inkhel dawn. Vawiin tlai dar 2:30 hian Mariners leh point thum mamawh Aizawl FC te an inhmachhawn dawn a, thleng nawn lo thei a nih avangin hmaih phal chi a ni lo.

I League hmahruaitu Mohun Bagan-in an champion nomawi humhim turin chak an tum ang a, season thara I League khel zel turin table mawngphah luahlumtu Mizo club tan chak loh a thiang tawh lo.

Aizawl FC coach Jahar Das erawh a zam lo. Mohun Bagan coach hlui chuan, "I League-a in upset-na lian ber kan thlentir dawn a, ka sawi fo tawh ṭhin angin season tharah I League kan la khel zel dawn," tiin Kolkata club lian hmaah a zam lo.

Jeje-a tel loin

Tun season-a Mohun Bagan tana player langsar bera chhal ngam chu Jeje Lalpekhlua a ni. Mizo tlangval hi India tan khel tura koh a nih avangin Kolkata club tan a inlan thei dawn lo a, Aizawl FC tlarhnung tan chanchin lawmawm a ni.

World Cup qualifier khel mek India squad-ah hian Bagan player zingah defender Pritam Kotal, midfielder Pronay Halder-te an awm bawk a, hliam vangin Balwant Singh leh Brandon Fernandes-te an inlan thei lo bawk ang.

Haiti international Sony Norde chu World Cup qualifier khelin a thangbo a, I league defender-te tana mangchhia winger ṭha tel lo tur hi Aizawl FC tan result ṭha neihna chance a ni.

Mahse, Mohun Bagan hi AFC Cup-ah meuh pawh hneh loh nei loa kaltluang mek an nih miau avangin an squad a chhah ṭha tawk. I League foreigner ṭha an sawi apiangin Katsumi Yusa lam hmaih a ni ngai lo a, Japanese midfielder hi Aizawl-a rawn zin zingah a tel.

Aizawl FC coach Jahar Das chuan, "Mohun Bagan ang team-ah chuan player panga vel awm lo tih hi a lang ve vak lo. Kil tinah player ṭha an kawl a, an kim lo chung pawhin team ṭha tak an ni," tiin an khingpui turte dinhmun a sawifiah thiam hle.

Aizawl FC tlarhnung

Mizo club-in an match hnu-hnung berah East Bengal lakah 2-0 zetin hma hruai mah se an inlehthaltir a, an player pahnih hnawhchhuah an ni bawk.

Player hnawhchhuah pahnih defender Emma Chigozie leh Lalramchullova-te an inlan thei dawn lo a, Nigerian defender aiah Lalchhawnkima chu Lalruatthara nen a laiah an inkawp a rinawm a, Chullova hmunruak luah turin Immanuel H.S. Lalṭhazuala khelmual chhungah inlan tura beisei a ni.

Ranti Martins dang thei lotu Aizawl FC tlarhnung tan 2006 FIFA World Cup-a Trinidad and Tobago tana inlan tawh striker Cornell Glen dan tum a hautak dawn a, LA Galaxy striker hlui hian Kolkata an intum ṭumin goal hnih a khung.

Eng nge an sawi?

Aizawl FC coach Jahar Das chuan, "East Bengal kan hmachhawn ṭumin team lian lakah goal khung kan harsat lo tih kan tarlang tawh a, kan phur vanglai tak a nih avangin Bagan hi hneh ngei kan tum a ni," a ti.

Bengali coach chuan sawi chhunzawmin, "Mohun Bagan nen hian kum 40 vel kan lo inhnimhnai tawh a, he club hi ka rilru awmna hmun a ni. Mahse, vawiina kan inkhelh hunah erawh professional ka nih avangin Aizawl FC tan theihtawp ka chhuah dawn a, Mizo mipuite min ṭawiawm turin ka sawm a ni," tiin RG Stadium-ah ṭawiawmtu an mamawh thu a sawi a, Mizo mipuite chu Mizo club tana pen chhuak turin a ngen.

Kum 1889-a din tawh, India rama club upa berin Mizo club vawiinah an lenchilh dawn a, chak mamawh Aizawl FC-in awmze neia au phurtu an mamawh.

Match 10 chhung team kaihruai thei lo tura hrem Mohun Bagan coach Sanjoy Sen-a'n a naute inkhel a kaihruai thei dawn lo a, a aiawhtu assistant coach Sankarlal Chakraborty-a'n an coach tel lo pawha buaina an neih loh thu a sawi.

Sankarlal chuan, "Aizawlah kan coach a lo zin tel a, technical area-a awm phal loh tih vel vangin kan buai phah lo. Aizawl FC hi team ṭha tak an ni a, an phu tawk result an hlawh chhuak lo ṭhin mai zawk a ni. Vawiina ka inkhel tur pawh inkhel awlsamah kan ngai lo a, I League nomawi chawi nawn kan tum avangin theihtawp kan chhuah ang," tiin chak ngei a tum.

Mariners assistant coach chuan sawi chhunzawmin, "Aizawl kalkawng a kikawi deuh a, kan la kal ngai lohna a nih avangin ka player zingah motor rui hial an awm bakah inkhelh hma nikhata lo thleng kan nih avangin kan chau. Mahse, vawiina kan inkhelh hunah erawh chhuanlam engmah neih kan tum lo," tiin Aizawl zinkawng hautak a tih thu a sawi.

Ngaihnawm

• Aizawl FC inkhel en man Rs 500, Rs 300, Rs 200 leh Rs 100 man ni ṭhin chu Rs 200, Rs 100 leh Rs 50-ah an tlahniam.

• Bagan striker Cornell Glen-a'n goal ruk a khung tawh a, a tluk loh chu Ranti Martins (11 Goals) leh Darryl Duffy (9 Goals) te chiah an ni.

• Bagan-in tun season-ah Shandong Luneng chiah an la hneh lo.

• Bagan-in AFC Cup leh I League-ah hneh loh an la tawng lo.

• Jeje, Balwant Singh, Pritam Kotal, Pronay Halder bakah India rama hlawh tam bera an sawi Sony Norde te Aizawlah an rawn zin tel lo.