Mizo-te'n pianpui thiamna an nei - Gawli

India captain hlui Mahesh Gawli chuan U Dream tana Mizoram a rawn tlawh chhungin Inter Village U16 inkhel a thlir a, veteran coach H. Vanlalthlanga hnuaia Mualpuia neih ṭhin non residential football training te tlawhin Mizo naupangte chu thiam a ti hle.

India-in defender a neih tawha ṭha ber anga an sawi Gawli chuan, "Inter Village football inlenaah team 100 chuang an tel thei a, player-te'n talent an nei ṭha em em bawk. Tun dinhmunah chuan Goa leh Mizoram chu inthlau tak a ni," tiin Mizoram chuan Goa an khum thu a sawi.

U Dream lam thil a kal tluan chuan April-ah emaw May-ah emaw Mizo naupang pali chu Germany-ah Hoffenheim hnuaiah training an nei ang. Kumin chhungin Mizo naupang dangte pawh Germany-ah hian Hoffenheim hnuaia football khelh zir turin an tir leh dawn a ni.