Inkhel hmuhnawma Bangladesh hnehtu India

Nilaini zan World Twenty20-ah Bollywood movie-a thleng niawma mawi a thleng a, mak taka Bangladesh laka hnehna changtu India hnehna chan dan chu thawnthu ziak thiam takin a tawpah ropui taka a changtupa a chettir ang mai a ni.

Bangalore khawpuia inkhel-ah India-in over 20 chhungin run 147 chiah an vaw chhuak thei a, mi pasarih an hloh. Target hu-phurhawm ni awma lang lo hi Bangladesh-in umin a tawp lamah an zuih ral a, over 20-ah run 145 siama mi pakhat hlohin run khatin hnehna an chang zo lo.

Ball thum leh hnehna

Indian batsman-te chet-chhiat zanah Bangladesh-in hnehna an chang dawn emaw an ti a, ball pathum chauh a awm tawh tiha chak tura an mamawh zat chu run hnih chiah a ni.

Mahse, India-in mualneitu an nihna an chhawr ṭangkai a, boruak sang tak karah zam loin an khel. Ball pathuma run hnih mamawh Bangladesh-in run an siam miah lo a, India lamin wicket thum lak nan an hmang thung.

Over 19.3 an khelh thlenga hlim taka lam Bangladesh fan-te an ṭap a, Asia Cup nomawi chawi hlim India erawhin semifinal luh beiseina an neih chu an chhawm nung zel.

Hun tawp chu

Over 19.1 (137-6)

Bangladesh tan Mahmu-dullah-a'n run khat a siam a, chak tura run an la mamawh zat chu run 10 a ni.

Over 19.2 (141-6)

Mushfiqur-a'n rin pawn lam-ah ball a vaw chhuak a, run li a siam.

Over 19.3 (145-6)

Mushfiqur-a'n India captain MS Dhoni man phak lohah a hlap a, four run siam lehin ball thum la bangah Bangladesh-in run hnih chiah chak turin an mamawh tawh.

Over 19.4 (145-7)

Bat tui laklawh Mushfiqur-a'n ropui takin a team chakpui tum mah se stump lai tak ball-in a fuh a, chak lawm tura inbeisei Bangladesh fan-te'n an wicket hloh lai an thlir.

Over 19.5 (145-8)

Mahmudullah-a'n hahdam tak leh awlsam taka ball vuak tum mah se Mushfiqur hnung a zui ve nghal.

Over 20 (145-9)

Bangladesh-in chak turin ball khatah run hnih an mamawh a, Mustafizur-a'n a team hi chakpui ngei tu mah se India-in Dhoni an nei a, Indian wicketkeeper hian Mustafizur hi stump-in India-in hnehna an chang.

Tu nge khel ṭha?

Indian batting lineup lan dan leh khelmual chhunga an khelh dan a inmil lo a, Indian batsman-te'n an khel ṭha tawk lo. Run siam hnem ber Suresh Raina chuan run 30 a tlin hram a, Pakistan laka hmuhnawm em em mai Virat Kohli pawhin run 24 bak a tlin lo.

Bangladeshi batsman zingah ball 32 a hmachhawna run 35 siamtu Tamim Iqbal a khel ṭha ber a, ball 15-a hma-chhawna run 26 siamtu Sabbir Rahman leh run 22 vaw chhuaktu Shakib Al Hasan-te'n an khel ṭha thawkhat viau bawk.

Indian bowler zingah over li a vawma run 20 chiah pea wicket hnih latu Ravichandran Ashwin a khel ṭha a, over tawp ber vawma wicket hnih latu Hardik Pandya hming sawi hmaih theih a ni lo.

Eng nge an sawi?

Bangladesh captain Mash-ra-fe Mortaza chuan, "Ball hnu-hnung pathum kha kan vanduaina chu a ni ta a ni. Kan vanduai ni a ni a, tih theih kan nei lo. Kan chak loh avangin kan lunghnur em em a, kan khelh dan pumpui thlir erawh chuan kan khel ṭhain ka hria," a ti.

Over tawp ber vawm tura fing taka Hardik Pandya thlangtu India captain Dhoni chuan, "A pawimawh ber chu player-te thusawi ngaihthlak vek hi a ni. Batsman ngaihdan leh bowler ngaihdan a in ang lo thei a, chuta ṭang chuan a
ṭha thei ang ber tura thutlukna siam a ṭul ṭhin, " tiin Pandya-a thlan chungchang a sawifiah.

Pathianni zan dar 7:30-ah India leh Australia an inhma-chhawn dawn a, he inkhela hi semifinal luh inchuhna inkhel tur anga ngaih theih a ni.