Miami Open-ah Williams chak nghal

Serena Williams chuan a vawi kua nana Miami Open title la turin a match hmasa berah Christina McHale a hneh.

World number 1 Williams hian nimin khan McHale lakah hian awlsam takin hnehna a chang mai bik lo a, third round lut turin 6-3, 5-7, 6-2 in a chak hram. Williams hian tun season-ah match 14 khelh tawhin vawi hnih chak loh a nei tawh a ni.

American star Williams hi seeded pakhatna a ni a, Miami-ah hian kum 2012 quarterfinal-a a chak loh hnuah a la tlawm leh miah lo a, a zawnin match 19 chhung hnehna a chang tawh.

Inkhel dangah Heather Watson chuan seeded 20-na Sloane Stephens chu 6-3, 6-0 in a hneh a, seeded 3-na Agnieszka Radwanska leh seeded pasarihna Petra Kvitova te pawhin an match hmasa berah hnehna an chang nghal.