Real & Barca an chak
Pathianni Zan Spanish La Liga inkhelah Real Madrid leh Barcelona ten an khingpui ve ve an hneh a, table a danglam lo - a chung berah Real an awm zel a, Barca-in an um.
Real Madrid hian Osasuna khelmualah goal chhuah hmasa zet mah se goal liin an chhanglet a, hun a tawp meuh chuan Zinedine Zidane-a naute hian 4-1 in hnehna
an chang.
Real Betis khelmuala inkhel boruak 'hot' ah 2-1 a an hnufual hnuin Barca-in 3-2 in hnehna an chang let a, red card vawi hnih phawrh a ni.
Madrid an kal zel
Osasuna khelmualah Unai Garcia chuan minute 14-na lekah goal hmahruai a khung a, Copa del Rey-a mualpho hlim Real hi an mualpho nawn dawn niin a lang.
Mahse, Osasuna goal hi Real chhaih kawlhna lek a lo ni a, Isco, Sergio Ramos, Lucas Vazquez leh Luka Jovic ten goal khat ṭheuha rawn chhangletin Real an chak chiang hle.
Real tan January 22 hnua a vawi khat nan Gareth Bale chuan inkhel bul a ṭan a, chhuak tur anga sawi reng Welsh forward hi minute 70-naah Vazquez chuan a thlak.
Barca an 'comeback'
Betis-in minute rukna leka Sergio Canales-a penalty hmangin hma an hruai a, minute thum hnuah Barca tan Frenkie de Jong chuan a
chhanglet zui.
Khel ṭha em em mai Nabil Fekir chuan minute 26-naah Betis tan rawn khung leh mah se Barca-in Sergio Busquets leh Clement Lenglet hmangin an chhang ve leh a, Catalan club goal thum hi Lionel Messi assist vek a ni!
Betis tan Nabil Fekir hnawhchhuah a nih aṭanga minute thumna lekah Lenglet hnawhchhuah ve leh a ni a, 3-2 a hma hruai hman Barca-in hnehna an chang zui.