Mahrez ṭha tawk titu Xavi

Barcelona legend Xavi chuan Leicester City winger Riyad Mahrez chu Catalan club tana khel tura a ṭhat tawk thu sawiin a fak.

Algeria international hi tun season-ah beisei phak baka ṭhain a khel a, Leicester-in Premier League-a hma an hruaina kawngah match 30 inlanin goal 16 a khung a, a ṭhiante thun tur vawi 11 a siamsak bawk.

Barca tana vawi 767 inlan thei Xavi chuan, "Player ṭha tak a ni a, tun season hma kha chuan Mahrez hi ka hre ngai lo. Mahse, tun season-ah erawh a khel ṭha takzet a, English league-a player langsar zingah a tel der tawh a ni," tiin a fak.

Xavi chuan kum 25-a upa winger chu fak chhunzawmin, "Foxes tana a khelh dan avangin Mahrez hi Europe-a khawi team-ah pawh khel turin a ṭha tawk tih kan hmu a, Barcelona tana khel tur pawhin a ṭha tawk a ni," tiin a dah sang hle.