Chawnpuiin hmahruaina hun ṭha bawhpelh

Zote Toyota MPL10-ah Chawnpui FC-in table chung bera awm turin I League khel zo hlim Aizawl FC an hneh a ngai a, amaherawhchu MPL champion lai Chawnpui hian point khat chauh an hlawhchhuah theih avangin Chanmari FC hnuaiah an lungawi a la ṭul.

Inrinni khan RG Stadium-ah MPL10 match pawimawh bik khelh a ni a, Chawnpui leh Aizawl FC te goal awm loin an inhnehtawk. I League club-in hun tawp lamah chance ṭha nei bawk mah se inkhel pumpui thlir chuan point khat ve ve an hmu hi result awm tak an ni thung.

AFC hian Zirtawpni zanah I League an khel ringawt lo a, inkhelh hma leh inkhelh lai thlengin ruah a sur nasa. Mizo club-in an hneh ngei tura an rin Delhi FC lakah beisei an pha lo a, goal nga ngawt chhuahin 5-1 in an tlawm. AFC hi an taksa a chau ringawt lo a, an result avangin rilru thlengin a nghawng tel.

Mahse, AFC squad hi a chhah. Chawnpui an hmachhawn ṭumin I League squad-a awm lo, player rintlak tho si player panga goalkeeper Joel Lalramchhana, midfielder Lalramsanga leh C. Lalmuanpuia, defender Rohmingthanga leh winger Joseph Lalvenhima ten bul an ṭan. Bench-a ṭhu tluan centre back Lalmuanawma (Munez), right back Lalhrezuala Sailung leh left back H. Lalrempuia ten bul an ṭan bawk a, tlarhnung lam chu tha thar vekin a sawi theih.

First eleven dang KC Larchhuakmawia, Lalbiakdika leh Rohmingthanga Bawlte te pawh I League-ah bench aṭanga lut an ni hlawm a, han bih chian tak tak chuan Chawnpui FC aiin I League club hi an la langsar zawk tho a, an buk a la rit hret zawk.

Chawnpui tana harsatna belhchah turin an player pawimawh Vanlalthanga (goal thum khung tawh) a awm lo a, AFC lamin goal sarih khung tawh Lalrinzuala squad-ah an dah lo bawk nen inkhelin beisei a pha lo. Football tihmuhnawmtu ber goal hmuh tur a awm lo a, chance a tam tawk lo bawk.

Chutihrualin Chawnpui defender Laltluangliana ball tlawh hman loh second half-a rawn lut David Laltlansanga (Avid-a) ball pette erawh vanneih ṭum ni se goal thei a ni thung. Avid-a hi futsal-a India player pawimawh kha a ni. Hun tawp lamah erawh Aizawl FC-in chance ṭha an ngah zawk a, bench aṭanga rawn lut Augustine Lalrochana'n a harsa zawng zawng a tih zawh hnuah a rilru a fim tawk lo a, keeper John Lalruatfela'n a dansak. Season liam ta best defender Lalruatfela chu Chawnpuiin goal an venhim nan a pawimawh a, man of the match-ah thlan a ni.