Venghnuai hmachhawn tur Chawnpui

Vawiin chawhnu dar 1:00 hian Chawnpui FC-in 1st Bn MAP Ground-ah FC Venghnuai an hmachhawn dawn a, Zote Toyota MPL10-a pahnihna ni mek leh table mawngphaha awm inkhel tur ni mah se chak tur zawk rin thiam a har hle.

Chawnpui coach Lalrindika Hmar chuan, "Inrinniah RG Stadium-ah kan inkhel zo chiah a, Thawhṭanniah 1st Bn MAP Ground-ah min inkhelh tir lehnghal dawn. Inrinnia kan inkhel dawn tih pawh kan hre tlai a, hetia min inkhelh tir lehnghal phei chu hriatthiam a har hle. Mizote phei chu Pathianniah kan chawl hlak a, Thawhṭanniah inkhelh a har ṭhin," tiin fixtures chungchanga a lungawi loh thu Vanglaini a hrilh.

Coach Rindika Hmar hi lungawi lo mah se an khelh tho a ngai dawn a, inkhel pawimawhna a ngai reng dawn. Chawnpui tan semifinal dinhmun tichiang turin chak a pawimawh a, chutihrualin ke bilh vanga chawl rei tur Vanlalthanga tel loa khelh an zir a ṭul dawn. AFC an hmachhawn ṭumin midfield a nung tawk lo a, fitness nei ṭha Venghnuai lakah an insiksawi hret a ṭul ang.

Venghnuai hian tun MPL-ah chak hmel an la hmu lo a, phase 1 match sarih aṭangin point khat chauh an hmu. Chutihrualin phase 2-ah erawh Venghnuai hian point an hmu nghal a, Electric Veng lakah vannei ni se point thum hmu tur zawk an ni. C. Ramdinmawia captain-na hnuaia khel Venghnuai hian Chawnpui laka point hmuh hi an châk. A chhan chu Chawnpui coach Rindika hi season liam ta Venghnuai enkawltu a ni a, player tam zawk hi season liam taa Venghnuai player an ni bawk.