Aizawl FC-in RG Stadium an chang

Zote Toyota MPL10 round 9 fixtures a chhuak a, RG Stadium-ah Aizawl FC leh Chhinga Veng te an inkhel ang a, a bak inkhel pathum chu 1st Bn MAP Ground-ah an khel ang. Phase 2 bikah AFC hian I League an khelhna hmun RG Stadium-ah match an nei ve ve.

Fixtures thlir mai chuan AFC hi an vannei a, chik lehzuala chhui erawh chuan an vanduai. Mizo club hian November 21, Thawhlehni hian I League-ah Namdhari an mikhual dawn. November 17, Zirtawpni zana Delhi FC laka an mualpho zawhah hahdamna hun ṭha nei loin Inrinniah Chawnpui an hmachhawn nghal a, Namdhari an hmachhawn hma hian ni khat chauh inbuatsaihna hun an nei ang.

I League match zawhah inpuahchahna hun pawh nei loin MPL match pawimawh bikah Chhinga Veng an hmachhawn dawn. I Day Football final-ah Chhingcows an chak a, Lalsangzuala Hmar hote hi an chak nawn a nih chuan palinaah an awm chho ang a, I League club hi panganaah an tla dawn.

MPL match thum 1st Bn MAP Ground-a khelh a nih chhan hi RG Stadium-ah I League khelh a nih vang a ni a; November 22, Nilainiah erawh RG Stadium a awl tawh avangin 1st Bn MAP Ground aiin thlan a ni zawk.

Tun season-ah MPL Board-in RG Stadium enkawltute aṭangin duhsakna an dawng tawk lo a, Mizoram chhunga football inelna sang ber hi Mizorama stadium ṭha berah khelh theih a ni ṭhin lo. Phase 1 match tam zawk kha 1st Bn MAP Ground-ah khelh a ni daih!