Euro 2024 khel tur Netherlands

Netherlands chuan 1-0 in Republic of Ireland an hneh a, Euro 2024 khel turin an inpetkai - inkhela goal awmchhun hi Manchester United striker hlui Wout Weghorst a khung a, Ireland-in a chhanletna tur an nei lo.

Group B aṭang hian Netherlands bakah France chu Euro khel turin an lo inpetkai tawh a, anni hian an mikhual Gibraltar chu Inrinni zan inkhel dangah 14-0 ngawtin an sawp!

France tan Kylian Mbappe chuan hattrick a siam a, Kingsley Coman leh Olivier Giroud ten goal hnih ve ve an khung a, Ethan Santos (own goal), Marcus Thuram, Warren Zaire-Emery, Jonathan Clauss, Youssouf Fofana, Adrien Rabiot leh Ousmane Dembele ten goal khat ṭheuh an khung bawk.

A goal hma

Netherlands-in hliam an ngah avangin an ṭhat dan berin squad an rem thei lo a, heti chung hian Ireland laka hnehna chang turin harsatna erawh an tawk lo - minute 11-na lekah Weghorst chuan goal hmahruai a khung.

Mikhual Ireland hian chance an nei hmasa zawk. Mahse, Alan Browne chuan a chance neih duhawm a chhawr thei lo a, Brighton & Hove Albion goalkeeper Bart Verbruggen zawnah tak a shot a kal.

Weghorst-a'n Netherlands-in awmze neia goal an nawr hmasak berah a khung nghal a, amah vengtu Nathan Collins tlansanin goalkeeper che ṭha zui tak Gavin Bazunu man rual lohin goal-ah a chantir.

Ireland an vannei

Mikhualna ramah Ireland an tlawm a, heti chung hian an vanneihna sawi a ngai - Netherlands-in chance vawi tam an nei chungin goal hmaah an hriam tawk lo a, goalkeeper Bazunu chet ṭhat zan a ni tel bawk.

Southampton keeper hian Liverpool forward Cody Gakpo chance neih tur chu a tibuai hman a, AC Milan midfielder Tijjani Reijnders-a hun neih ṭhat chu ṭha zetin a dang bawk - Weghorst pahin goal dang khung theihna nei mah se a chhawr lo.

Bench aṭanga luhtir Donyell Malen pawhin chance a nei a, mahse, Buzunu chuan a lo dansak leh - Ireland lamin tlarhmaah an keeper hnathawh ṭhat angin an thawk ve thei lo a, a tawpah Netherlands an chak.