Rawlthar duhawm ber Bellingham

Real Madrid midfielder Jude Bellingham chu 2023 Golden Boy award hlan a ni, chawimawina hi European league lian hoa khel lai zinga player naupang kum 21 hnuai lam zinga ṭha ber hnena hlan ṭhin a ni.

England international Bellingham hian nipui bazar lai khan Borussia Dortmund aṭangin Real Madrid a zawm. Spanish club tan hian match 14 a khelh aṭangin goal 13 a khungsak der tawh - khelmual chhunga player hmunawm leh ṭangkai a ni tel bawk.

Kum 20 mi Bellingham chuan, "Hetiang hun ka thlen theih nana min puitu, football zinkawng ka zawhna Birmingham, Dortmund leh Madrid chungah ka lawm, anni avanga tun hun thleng thei chauh hi ka ni.

"Ka chhungte chungah ka lawm bawk, anni hian hun harsa leh hrehawm ka tawh lai pawhin tawpchin nei loin min thlawp reng a ni. Award ka dawn hi a tawpna ni lo se, hmalam pana kal zel ka tum ang," tiin a sawi.

English player zingah Bellingham hi Raheem Sterling (2014) hnua Golden Boy award dawng leh thei hmasa ber a ni a, he chawimawina hi tun hmain Wayne Rooney, Lionel Messi, Kylian Mbappe leh Erling Haaland te pawhin an dawng tawh a ni.