Albania-ah Mizo MMA fighter leh referee

International MMA Federation (IMMAF) buatsaih neih tur World Amateur Mixed Martial Arts championship-ah Mizoram State MMA Association (MISMA) fighter Zarmawia, Chite veng chu a tel dawn a, MISMA technical chairman Samuel Lalrozama, Dawrpui chu referee hnathawk turin a kal ve bawk.

Vawiin aṭanga Tiran, Albania-a neih tur inelnaah hian MMA India national federation aiawhin fighter panga leh official (Referee & Judge) pali an kal a, an zingah Featherweight (-65.8 kgs)-a fight tur Zara a tel - fighter te hi kum 2023 chhunga national event hrang hranga che ṭhate national federation chuan a thlang a, official tur erawh hi chu World body-in a thlang be thung a ni.

Zarmawia hi weight pathumah national champion niin India rama record holder ni mek a ni a, LPS leh MISMA ṭangkawpin an huaihawt Mizoram Fight League champion lai a ni bawk. IMMAF chuan ITO (International Technical Official) turin mi 40 an thlang a, an thlan zingah Samuel-a a tel a, Albania a pan ve dawn bawk.