Everton point an paihsak!

An sum hman leh lakluh inbuktawk kawngah Everton chuan dan an bawhchhia a, hei vang hian Premier League point an hmuhsa aṭangin point 10 paihsak an ni. English football inelna sang bera hetiang ang hremna nasa ber a la ni hial.

Everton hian tun season kal laiah point 14 an hmu tawh a, match 12 khelh thleng kha chuan 14-na dinhmun an luah, mahse point an paihsak takah chuan point li chauh neiin a hniam ber dawtah an awm, an hnuaiah Burnley chauh awmin an point neih a inzat.

Toffees chuan hremna hi an khinlet tur thu an sawi a, thiam chan theih pawh an inbeisei. EPL club-te hi kum thum chhungin pound maktaduai 105 thlenga an hloh phalsak an ni a, a aia tam erawh phal a ni lo - an sum lakluh nen a inmil tur a ni.

Kumin March thla khan Everton chuan 2021-22 season chhung khan pound maktaduai 44.7 an hloh thu an puang a, tun hnaiah a zawnin season nga ngawt chu sum hloh zawngin an kal tawh, an dinhmun hi chhui chian niin an chungah hremna hi an lekkawh ta a ni.