Nagelsmann enkawl Germany an mualah chak lo

Julian Nagelsmann hnuaiah Germany-in an mualah a vawi khat nan an khel a; November 18, Inrinni khan Berlin-ah Turkey chu friendly match-ah 3-2 in an hneh lo. Germany hian Euro 2024 an thlen dawn avangin qualifying round khelh ve a ngai lo a, chutihrualin Hansi Flick an ban hnu pawha an result a ṭhat loh avangin German Football Association (DFB) thuneitute pawh an lu a hai khawp ang.

Germany-in bul an ṭan ṭha. Minute ngana lekah Turkey tlarhnung an ṭhiat a, Benjamin Henrichs leh Leroy Sane te thawhrah sengin Kai Havertz-a'n goal hmahruai a khung. Sane-a'n chance ṭha dang a hlah leh bawk.

Mahse, Germany hi an buaina ngaiah bawk an buai - tlarhnung a phui thei lo. Centre back Abdulkerim Bardakcı ball vawrhluh chu Ferdi Kadioglu-a'n minute 38-naah goal-ah chantir. Mual dinglamah hmun awl a tam a, injury time-ah Kenan Yildiz-a'n hmang ṭangkaiin chiang zetin a pet goal.

Halftime-ah 2-1 in mikhual team-in hma an hruai a, second half ṭan aṭanga minute linaah Niclas Fullkrug hmangin siphurh an sut. Fullkrug ball petu hi Bayer Leverkusen tana che ṭha Florian Wirtz a ni.

Germany-in tlarhnung an tiphui thei lo, Turkey midfielder Salih Ozcan-a'n goal ban pawn lam a pet per. Minute 68-naah Turkey-in freekick an pet a, box chhungah ball-in Havertz-a kut a per a, VAR hmanga en hnuah penalty an pe. Yusuf Sari rawn pen chhuakin minute 71-naah chakna goal a khung a, Germany keeper Kevin Trapp dive dik mah se a nam chhuak thei lo.

October international break hma khan Germany hian manager atan Julian Nagelsmann an lalut a, United States-ah zinin USA hi friendly match-ah 3-1 in an hneh nghal. Mahse, Germany hi Mexico nen inkhel lehin 2-2 in an inhnehtawk.

Nagelsmann hnuaiah Germany-in vawi thum khel tawhin chak, inhnehtawk leh chak lo a awm vek tawh. November 21, Thawhlehni zan dar 1:15 hian Germany-in Ernst Happel Stadion-ah Austria nen friendly match an khel ang.