Union Berlin manager a bang

Bundesliga club Union Berlin manager Urs Fischer chuan kum nga hnuah German club hi a chhuahsan a, thutlukna chu club thuneitute nen inberawn chunga siam an nih thu an sawi.

Kum 57 mi Fischer hian fans thuhnuaia awm Union Berlin hi June 2018 aṭang khan enkawl ṭanin, a season hmasa berah Bundesliga khel turin a tlinpui a, an tla thla leh tawh lo.

Heng zinga season thumah hian European football a khelhpui a, tun season-ah an club chanchina a vawi khat nan Champions League an khel. Mahse, tun season-ah beisei an phak lo a, league match 11 khelh tawhah vawi hnih chiah la chakin, table mawng phah an luah mek.

Union president Dirk Zingler chuan, "Keima tan mai ni lo, Union chhungkaw tan chuan vawiin hi ni hrehawm tak a ni. Tun hnaia kan result chhiate kan siam ṭha thei lo hi hrehawm kan ti a, Fischer hoa kan hlawhtlinnate kan thlir let hian, ka hlim em em a ni," a ti.

Zingler chuan sawi zawmin, "Kan inṭhenna hi hrehawm viau mah se, Urs Fischer hian kan ṭhian ṭha tak ni chungin min chhuahsan a, he club-ah hian a tan hmun a awm reng dawn a ni," a ti.

Union Berlin hi Under-19 coach Marco Grote chuan a enkawl lailawk ang a, Marie-Louise Eta chu assistant coach a ni ang - Eta hi Bundesliga-a hmeichhe coach hmasa ber a ni dawn a ni.

Fischer hian Union hi Bundesliga-a a season hmasa berah 11-na nihpuiin, pasarihna, pangana leh palina a nihpui zui a, Europa Conference League, Europa League leh Champions League a khelhpui vek thei - club budget nena ngaihtuahin a sulhnu hi a ropui hle.

Union hian tun season-a an league match hmasa pahnihah hnehna chang ve ve mah se, a hnu match kuaah an tlawm vek a, Champions League-a match li an khelh tawhah chak la nei loin group C mawngphah an ni a, last 16 an lut thei lo chiang tawh.