Al Ittihad coach thar Marcelo Gallardo

Saudi Pro League club Al Ittihad chuan Argentina international hlui Marcelo Gallardo chu head coach atan an ruat. Kum 47 mi Gallardo hian kum 2025 thleng contract a ziak a, Tottenham leh Wolverhampton Wanderers manager hlui Nuno Espirito Santo a thlak.

Gallardo hi a inkhelh hun laiin River Plate, Monaco, Paris Saint-Germain, DC United leh Nacional tan te a khel a, inkhelh a chawlhsan hnuin a club khelh tawpna Uruguayan club Nacional a enkawl chhunzawm nghal. Kum 2014 leh 2022 chhung khan River Plate a enkawl a, nomawi ṭhahnem tak a chawipui zingah Copa Libertadores vawi hnih a tel.

Argentine manager Gallardo hian kum 2022 zawhah a chawl hahdam a; November 18, Inrinni khan Al Ittihad enkawl turin an puang. Al Ittihad-in Nuno Santo an ban chhan hi result ṭhat tawk loh vang a nih bakah captain Karim Benzema nen inhmuh thiam loh vanga ngaih a ni. Saudi club hian Wolves boss hlui Julen Lopetegui pawh an bia a, mahse Spanish manager hian Premier League club enkawl beiseiin an sawmna hi a hnar.